Dy kryetarë Bashkie të Qarkut të Tiranës, janë mandatuar nga dy gjykata të ndryshme.
Abc News ka siguruar dy vendimet e dhënë, nga dy gjyqtarë të së njejtës gjykatë, por me interpretime të ndryshme, në lidhje me vërtetimin e vlefshmërisë së mandatit për kryetarin e Bashkisë së Tiranës, Erion Veliaj dhe atë të Kamzës, Xhelal Mziu.
Referuar Kodit Zgjedhor çdo kandidat fitues i zgjedhjeve lokale duhet të çertifikoje rezultatin në Gjykatë për të marre mandatin e kryetarit të bashkisë.
Sipas kësaj procedure ligjore, i pari që i është drejtuar Gjykatës së Rrethit në Tiranë është kandidati i PS-së Erion Veliaj. Gjyqtari Neritan Cena, brenda dy seancave gjyqësore dhe pas administrimit të shkresave të dorëzuara nga KQZ-ja shpalli vlefshëmërine e mandatit për kryetarin e Bashkisë së Tiranës, Erion Veliaj, i cili dy ditë më pas hyri në zyrën e të parit të kryeqytetit.
Të njejtën rrugë ndoqi në Gjykatën e Rrethit të Tiranës edhe kandidati i PD-së që fitoi zgjedhjet e Bashkisë së Kamzës, Xhelal Mziu.
Pas hedhjes së shortit elektronik, kërkesa u mor në shqyrtim nga gjyqtari Asim Vokshi. Ky i fundit, në një arsyetim të hollësishëm, duke ju referuar Kodit Zgjedhor, ligjit për “organizmin dhe funksionimin e qeverisjes vendore”, Kodit të Procedurës Civile dhe atij administrative arriti në përfundim se nuk është Gjykata e Rrethit Tiranë kompetencës për të shqyrtuar këtë kërkesë. Gjyqtari Vokshi arsyetoi se kërkesa për e Xhelal Mziut nuk duhet të shqyrtohet nga Gjykata e Rrethit të Tiranës por nga Gjykata Administrative.
Për këtë fakt, gjyqtari Vokshi delegoi cështjen në gjykatën administrative, e cila pasi shqyrtoi kërkesën e Mziut vendosi vlefëshmërin e mandatit të kryetarit të Bashkisë së Kamzës.
Kemi dy vendime, nga dy gjykata të ndryshme, me dy arsyetime të ndryshme, por për të njejtin funksion, atë të kryetarit të Bashkisë.
