Ndërsa mediat shqiptare në Kosovë dhe Shqipëri si dhe pothuajse gjithë politika shqiptare e Luginës e kanë quajtur marrëveshjen e sotme të Preshevës si historike, ka pasur edhe shqiptarë që kanë qënë kundër saj.
Lëvizja Vetëvendosje është shprehur se shqiptarët në Preshevë, Medvegjë dhe Bujanoc (PMB) nuk do të duhej që ta kopjojnë e imitojnë Beogradin dhe as të kufizohen vetëm te reagimet ndaj tij.
“‘Zajednicën’ në Kosovë nuk e kërkuan serbët e Kosovës por Beogradi i cili do më shumë territor të Kosovës për Serbinë e jo më shumë të drejta për serbët në Kosovë. Prandaj, politikanët shqiptarë në PMB duhet që njëkohësisht ta kundërshtojnë ‘Zajednicën’ e Vuçiqit me Mustafën në Kosovë e jo ta legjitimojnë atë me pasqyrim kërkese”, thuhet në komunikatën e Vetvendosjes.
Për më tepër, sipas Vetvendosjes, “kryetari i komunës së Preshevës, Ragmi Mustafa, duhet ta tërheq dhe ta shpallë të pavlefshme ‘Zahvalnicën’ që ia dha Vuçiqit para dy muajsh e të cilën nuk e publikoi asnjëherë se çfarë shkruante aty”.
Por edhe në Preshevë kishte shqiptarë që bojkotuan marrëveshjen. Në mbledhje nuk morën pjesë përfaqësuesit e opozitës në Luginë, Partia e Veprimit Demokratik e Riza Halimit.
Ndërkaq ngjarja e rëndësishme në Preshevë është ndjekur nga një heshtje e thellë nga politika në Tiranë, Prishtinë dhe Shkup.
Në Tiranë i vetmi reagim që ka ardhur ishte ai i deputetes Mesila Doda që konsideron se “krijimi i asociacionit, është padyshim një lajm I mirë që shpall fillimin e punës së një organizmi te bashkuar, që do ndihmojë dhe fuqizoje shqiptarët e Luginës për të forcuar rolin e tyre dhe përmirsimin e kushteve ekonomike, politike e sociale”.
Zyrtarët e Tiranës nuk janë shprehur kundër por as nuk kanë reaguar ndaj marrëveshjes së Preshevës.
Politika zyrtare në përgjithësi nuk reagon ndaj ngjarjeve në rajon por as zyrtarët e opozitës nuk kanë thënë ndonjë fjalë përfshirë edhe nacionalistë si Kreshnik Spahiu i Aleancës Kuqezi.
Edhe zyrtarët e Kosovës në qeveri apo parti politike kanë heshtur vec Vetëvendsojes. Nuk kemi asnjë deklaratë nga Mustafa, Thaci, Haradinaj, Pacolli.
