Kryetari i Partisë Demokratike Lulzim Basha pati sot një mëngjes pune me Presidenten e Republikës së Kosovës, Atifete Jahjaga, e cila shoqërohej nga Ministria e Tregtisë dhe Industrisë, Hykmete Bajrami, Selim Selimi këshilltar për çështjet ligjore dhe i ngarkuari me punë i ambasadës së Kosovës Ramiz Lladrovci.
Presidentja e Kosovës ka vlerësuar mbështetjen e madhe që PD dhe Basha i kanë dhënë Kosovës si për shpalljen e pavarësisë ashtu dhe për njohjen e saj ndërkombëtare.
Ashtu si dje në qeveri dhe sot në opozitë, Partia Demokratike tha Basha do të vazhdojë të ofrojë të gjithë mbështetjen për procesin e liberalizimit të vizave, anëtarësimin në institucionet ndërkombëtare dhe njohjen nga shtete që ende se kanë njohur Republikën e Kosovës, në mënyrë që të bëhet sa më parë anëtare e OKB-së.
Kryetari I Partisë Demokratike theksoi se ndonëse i ka përshëndetur dhe inkurajuar takime më të shpeshta mes dy qeverive, duhet veprim konkret, pasi siç u shpreh dhe Presidentja Jahjaga, sipërmarrësit ende përballen me pengesa doganore, me taksa dhe tarifa që shtohen dhe rriten. Basha tha se hapat për zgjerimin lehtësimin dhe thellimin e bashkëpunimit duhet të jenë funksionale dhe praktike.
Basha përmendi si fushë të rëndësishme të bashkëpunimit mes Shqipërisë dhe Kosovës energjinë duke theksuar nevojën e një vizioni dhe vendosmërie të re për të bërë të mundur në fushën energjetike një ndryshim kolosal të ngjashëm me atë që solli ndërtimi I Rrugës së Kombit.
Një vend të veçantë në takimin Basha – Jahjaga zunë dhe zhvillimet e brendshme në të dy vendet, ku sfidë e përbashkët për zhvillimin ekonomik dhe integrimin mbetet lufta kundër krimit dhe korrupsionit.
Duke u ndalur në zhvillimet në Shqipëri, Basha theksoi se vendi ka bërë hapa pas në standardet demokratike, kusht për integrimin europian, siç janë zgjedhjet e lira dhe të ndershme, promovimi në nivele të larta drejtuese të shtetit dhe administratës të personave me precedent kriminal, pasiguria juridike, rënia ekonomike dhe më e fundit shkatërrimi i standardeve të zgjedhjeve. Raporti I OSBE – ODIHR për zgjedhjet e 21 qershorit nënvizon problematikën e madhe e cila ka pamundësuar shprehjen e lirë të vullnetit të zgjedhësve, përmes presionit, shitblerjes së votës etj.
Lideri i opozitës Basha ka vlerësuar maturinë e treguar nga klasa politike e Kosovës për krijimin e Gjykatës Speciale si një zgjidhje që do tu japë fund akuzave dhe përbaltjeve kundër luftës së drejtë çlirimtare të popullit të Kosovës. Serbia, tha Basha, duhet të përgjigjet për dramën familjare dhe kombëtare të mijëra personave të zhdukur. Basha ka vlerësuar edhe progresin e dialogut midis Kosovës dhe Serbisë, në funksion të një realiteti të ri bashkëpunimi vetëm mes Kosovës dhe Serbisë por edhe mes vendeve të tjera të rajonit.
Bashkëpunimi rajonal është një mundësi e madhe për zhvillim ekonomik, theksoi Basha duke nënvizuar investimin politik të kancelares Gjermane Angela Merkel përmes procesit të Berlinitsi një mundësi që duhet miradministruar për të thithur investitorë të huaj por edhe për të përfituar fonde për zhvillimin e infrastrukturës, dhe për të nxitur bashkëpunimin në fusha të ndryshme mes vendeve të rajonit, duke krijuar në këtë mënyrë një bashkëjetesë të re mes popujve tanë.
Basha – Jahjaga: Veprime konkrete për shmangien e pengesave doganore për sipërmarrësit
