Balkanweb ka publikuar disa të dhëna të kontratës së nënshkruar mes çekëve që administronin OSHEE-në dhe kompanisë DIA, e drejtuar nga Kastriot Ismailaj. Kontrata është nënshkruar më 1 shtator 2010. Kontrata është në gjuhën angleze, me 16 faqe dhe me vlerë dyvjeçare, me qëllim zgjatjen edhe 2 vite të tjera.
Sikurse shkruan balkanweb, nga të dhënat e kontratës dhe datat e saj hidhen poshtë pretendimet se Meta ka përfituar ryshfete. Përfundimi mbështet mbi faktin se nga të dhënat duket qartë se kontrata është nënshkruar në kohën e PD-së kur CEZ drejtohej nga Sait Dollapi dhe në atë kohë Meta nuk ishte kryeministër, por Ministër i Jashtëm.
Në fakt edhe ish-kryeministri Berisha ka deklaruar sot se Meta ka qënë ministër I Jahstëm kur është nënshkruar kontrata por se ai ka ndikuar në emër të qeverisë dhe pa autorizimin e saj për të dhënë shërbimin e mbledhjes së borxheve të DIA.
Balkanweb shkruan se ndryshe nga sa thuhet, nga dokumentet del se data e themelimit të DIA ka qënë 5 korriku i vitit 2010 dhe po në 4 gusht të atij viti ajo është regjistruar në Qendrën Kombëtare të Bizneseve. Kontrata e saj me CEZ, siç e përmendëm edhe më sipër është nënshkruar më 1 shtator 2010, kur Meta ishte ministër i Jashtëm, kohë e cila përkon edhe me një vizitë të tij në Honduras, shtet i cili ka njohur në atë kohë Pavarësinë e Kosovës.
Në fakt askund nuk është thënë se Meta ka qënë në Shqipëri apo në Pragë ditën kur është nënshkruar kontrata. Ajo që është thënë lidhet me udhëtimin e Metës në Pragë për të ndikuar marrëveshjen në favor të DIA, dhe kjo nuk bëhet ditën e nënshkrimit të kontratës.
Përsa i përket datave 29 nëntor dhe 1 dhjetor Meta ka marrë pjesë në mbledhjen e aksionerëve të bordit të CEZ në rolin e ministrit të Ekonomisë dhe si përfaqësues i aksioneve shtetërore në CEZ, praktikë kjo e ndjekur edhe nga ministrat e tjerë të Ekonomisë duke zbatuar Kushtetuën e cila thotë se ministri i Ekonomisë është përfaqësuesi i aksionarit shtet, shpjegon balkanweb në lajmin e saj lidhur me kontratën.
