Aksioni kundër informalitetit është bërë tashmë kryefjala e këtyre ditëve, i cilësuar nga qeveria edhe si objektivi i këtyre 300 ditëve, ndërsa ekspertë të ndryshëm e kanë parashikuar si një dështim këtë “luftë” frontale e cila dëmton shumicën e biznesit të vogël që dominon në Shqipëri. Por, pavarësisht aksionit konkret, akoma qeveria ka mbetur në fazën e “propagandës” për të zënë një hapësirë të madhe mediatike. Kjo gjë vihet re edhe sot, në konferencën që kryeministri Rama po zhvillon në nisje të këtij aksioni, ku vazhdimisht po shihet që Rama përsërit rëndësinë e betejës, për të krijuar zhurmë me batutat e tij, dhe jo aksion konkret.
Ai e quan një luftë patriotike operacionin:
“Ka nisur të vijë era shtet por për një shtet që meritojnë fëmijët tanë duhet ende punë dhe pjesë shumë e rëndësishme është operacioni që nisim sot. Një operacion në mbrojtje të konsumatorit dhe në krah të sipërmarrësve që paguajnë taksat dhe kundër zinxhirit të hajdutërisë që shkencërisht quhet informalitet por shqip quhet hajdutërisht”.
Por përveç batutave të tij, nuk kishin si të mungonin as kërcënimet ndaj tatimorëve, për të treguar që edhe nga radhët e administratës të punësuar prej tij, nuk do të tolerohen.
“Ju nuk jeni as të pafajshëm e as të qetë, se këtu në ju e pas jush informaliteti ka agjenturën e bashkëpunëtorët, në grabitjen e tasave dhe shkeljes së ligjit. Njësoj si vëllezërit e simotrat tuaja që në kompaninë e shpërndarjes së energjisë bënin të njëjtën gjë aty do shkojnë edhe ata ndër ju që bënin atë që bënin ata. Të hidhet përpjetë kush të dojë e të thotë se po ekzagjeroni me hekurat, ndërkohë që nuk ekzagjeroj asgjë, përkundrazi sikur të kishte vërtetë gjykata, do kishim problem serioz me hapësirat në dispozicion për ta që meritojnë të jenë atje”-tha Rama.
Propagandë kundër informalitetit, Rama e cilëson “luftë patriotike”
