Qeveria nuk e fsheh zellin e investimit të saj, në mbështetje të kryebashkiakut të Tiranës Erion Veliaj. Ky zell dukshëm bie në sy, kur për çdo javë nga një ministër shkon në zyrën e Erion Veliajt, raporton, premton dhe merr përsipër zgjidhje të ndryshme.
Serinë e ministrave raportues te Erion Veliaj e nisi Eglantina Gjermeni .
Ministrja e Zhvillimit Urban, nga zyra e kryebashkiakut të Tiranës, nënshkroi në fillim të muajit një marrëveshje bashkëpunimi e cila synon hartimin e një plani të ri zhvillimor që i përgjigjet territorit aktual të Tiranës me 24 njësi të reja administrative. Ndërsa nuk dihet se ka nisur puna për hartimin e këtij plani zhvillimor, ajo që dihet ka të bëjë me atë se në projektet e qeverisë është një tjetër plan zhvillimi, por jo vetëm për Tiranën, por për Tiranën e Durrësin së bashku, projekt i nënshkruar edhe nga ministrja Eglantina Gjermeni dhe nga ish-ministri Eerion Veliaj.
Për nga rëndësia e ministrisë që drejton, ministri i Punëve të Brendshme Saimir Tahiri i ka rezistuar deri tani shkuarjes në zyrën e Erion Veliajt. Por, kjo nuk e ka penguar që të jetë hija e tij, në disa takime, ku Erion Veliaj ka premtuar ndëshkim për abuzuesit me ambientet publike dhe Saimir Tahiri ka tundur kokën në shenjë miratimi, aprovimi dhe premtimi…
Ende nuk ka ndonjë dokument të nënshkruar mes Erion Veliajt dhe Saimir Tahirit…, mundësi kjo, që e lë të hapur që edhe Saimir Tahiri të shkojë në zyrën e Erion Veliajt.
Më i fundmi ministër që u thirr nga Erion Veliaj në zyrën e tij, si për të zgjeruar edhe gjeografinë e mbështetjes së koalicionit, ishte Edmond Panariti i LSI-së.
Dje, Ministri i Bujqësisë, Zhvillimit Rural dhe Administrimit të Ujërave Edmond Panariti në takimin e zhvilluar me kryetarin e Bashkisë së Tiranës Erion Veliaj, ka qenë më i avancuar se dy ministrat pararendës, sepse ka guxuar dhe ka propozuar, diçka,sikurse krijimin i Polit të Bujqësisë për Tiranën.
Nga ana e tij, kryebashkiaku nuk kishte se si të mos mirëpriste këtë propozimi, për të cilin nuk u nënshkrua ndonjë letër…
FOTO/ Ministrat në rresht, raportojnë dhe premtojnë te Erion Veliaj
