Lidhur me goditjen e grupit kriminal me 14 shqiptarë që trafikonin lëndë narkotike në drejtim të Italisë, ka reaguar kreu PD-së, Lulzim Basha. Sipas tij, jo rastësisht është i përfshirë një oficer policie në trafikun e drogës dhe ky është një tregues që gjendja është kritike. Sipas tij, përfshirja e efektivit blu tregon se pushteti është veshur me krimin dhe pas gjithë kësaj fshihen pushtetarë të lartë.
“Në krye të bandës së trafikut qëndronte vetë shefi i burimeve njerëzore të Policisë së Vlorës, Vladimir Zanaj, i shkarkuar në vitin 2007 nga Policia e Shtetit, pikërisht prej dyshimeve për përfshirje me bandat kriminale, por i punësuar me “Rilindjen” në tetor të vitit 2013.
Po qeveria çfarë bën ndërkohë? Është në luftë me qytetarët. Është në luftë me të pamundurit. Është në luftë me besimtarët. Është në luftë me azilantët e dëshpëruar. Është në luftë me biznesin. Kjo qeveri, Edi Rama dhe Ilir Meta, janë ndërkohë në paqe me bandat. Janë në paqe dhe në bashkëpunim me kontrabandistët. Janë në paqe dhe në bashkëpunim me të inkriminuarit që i kanë sjellë në pushtet e në poste kyçe. Janë në paqe dhe në bashkëpunim me klientelën e tyre të korruptuar”, tha Basha.
Reagimi i ashpër i Bashës lë të kuptohet se opozita më e madhe të zhvillojë protesta kundër qeverisë, që sipas Bashës i ka hapur luftë qytetarëve.
“Partia Demokratike dhe unë, jemi në krye të thirrjes për ta ndalur qeverisjen e krizës, qeverisjen e krimit dhe korrupsionit. Ne kemi një plan për shpëtimin e vendit dhe bashkë me qytetarët shqiptarë do t’ia dalim”, u shpreh Basha.
