Gjobëvenia 400 mijë euro babait, zbardhet skenari si vajza me të dashurin sajuan rrëmbimin

Ndonëse vajza 18-vjeçare, Nensi Çobo, ka luajtur rolin kryesor në ngjarjen e ndodhur, policia dyshon se ideatori i krimit ka qenë në fakt i dashuri i saj Orion Hoxha.
E dashura e tij, Nensi Çobo ka dëshmuar se ai i kishte vënë syrin një lokali në katin e parë të një pallati në zonën ku banonte në Tiranë. Adoleshenti ëndërronte ta blinte këtë lokal dhe më pas ta menaxhonin së bashku në cilësinë e pronarëve të biznesit.
Me këtë plan, të rinjtë sajuan edhe rrëmbimin.
Të enjten në mëngjes, Nensi Çobo, 18 vjeçe, ka dalë nga shtëpia pa lënë adresë. Sipas hetimeve dhe mesazheve që iu janë gjetur në celularë, ajo është takuar me të dashurin e saj, Orion Hoxha, me të cilin ka qëndruar deri pasdite nëpër Tiranë. Rreth mbrëmjes ata kanë shkuar në një hotel në zonën e Selitës. Vajza nuk është kthyer në shtëpi atë ditë, duke alarmuar familjarët e saj.
Në orët e mbrëmjes, babanë e vajzës, biznesmenin Laver Çobo, e ka telefonuar një numër privat. Telefonuesi ka kërkuar 400 mijë euro, duke thënë se kishte vajzën. Për ta provuar këtë fakt, në telefon është dëgjuar edhe zëri i Nensit, që dukej se po qante dhe të thoshte: “O babi, këta kanë armë”. Menjëherë babai i vajzës është drejtuar në Policinë e Tiranës ku ka bërë denoncimin.
Këtu ka qenë edhe momenti i kthesës së rrjedhës së ngjarjeve. Aktivizimi i policisë ka frikësuar vajzën 18- vjeçare, e cila ka vendosur të heqë dorë nga plani i gjobëvënies.
Policia u alarmua nga denoncimi i biznesmenit dhe filloi verifikimin e të gjithë personave që kishin njohje me vajzën 18-vjeçare. Ndërsa kjo qëndronte në hotel, i dashuri i saj, Orion Hoxha, dhe miku i tij, Kristi Gjore, vunë re prani të madhe të policisë në zonën ku banonte familja e vajzës. Efektivat e policisë kryen patrullime dhe kontrolle edhe në adresën e banimit të Orion Hoxhës, të dashurit të vajzës së biznesmenit. Kjo gjë i alarmoi tre adoleshentët, pasi edhe dy djemtë njoftuan 18-vjeçaren për faktin se babai i saj kishte shkuar në polici.