Sjellja e Dokles e Kokëdhimës ndaj Blushit, “qetësi para furtunës”

Deputetët e mazhorancës kanë refuzuar sot ti cilësojnë debate, përplasjet e shpeshta mes kryeministrit Edi Rama dhe deputetit Ben Blushi.
Pas mbledhjes së sotme të Grupit Parlamentar të PS-së, të vetmit që u prononcuan për këto debate, ishin Namik Dokle e Koço Kokëdhima…, sepse këta ishin të vetmit që nuk kishin reaguar, megjithëse Ben Blushi, ju përmendi emrat në mbledhjen e dy ditëve më parë të Asamblesë Kombëtare të PS-së.
Në prononcimin sot për mediat deputeti Namik Dokle, u shpreh shumë racional.
“Këto diskutime janë të shëndetshme”.
Ndërsa deputeti Koço Kokëdhima theksoi se nuk janë debate por opinione të Ben Blushit.
“Nuk janë debate por opinione të Blushit. Ne jemi të ndryshëm dhe kemi opinione të ndryshme. Po ndjekim praktikat e partive homologe”, u shpreh Kokëdhima.
Ky qëndrim i sotshëm i dy deputetëve të PS-së, mbushur me “qetësi e dashuri”, nuk i ngjan aspak, atij të dy ditëve më parë, të deputetëve Sadri Abazi e taulant Ballës, pa përmendur qëndrimin e kryesocialistit Edi Rama.
Qetësia e sotme e deputetëve të PS-së, i ngjan “qetësisë para furtune”, me shumë gjasa të pritshme në ditët, apo javë e ardhshme…
Ndërkohë, në mbledhjen e tij të sotme, Grupi Parlamentar i Partisë Socialiste ka vendosur që të votojë pro Projektligjit për Arsimin e Lartë i cili do të diskutohet ditën e nesërme në seancën e posaçme parlamentare.