Dëbohet nga Italia shqiptari i akuzuar si rekrutues i luftëtarëve për Shtetin Islamik. Pasi gjykata e liroi për mungesë provash 38-vjeçarin, Alban Elezi, autoritetet lokale kërkuan riatdhesimin e tij në Shqipëri.
Autoritetet italiane kanë vendosur të dëbojnë shtetasin shqiptar Alban Elezi. Vendimi erdhi pasi Gjykata italiane liroi 38-vjeçarin e arrestuar pak kohë më parë në Shqipëri dhe i ekstraduar në Itali me akuzën si rekrutues i luftëtarëve të rinj në ushtrinë e Shtetit Islamik.
Gjykata italiane ka hedhur poshtë akuzën e Prokurorisë, duke pranuar rekursin e avokatit mbrojtës të Alban Elezit dhe lënien në gjendje të lirë të klientit të tij nga burgu i Kanton Mombello i qytetit të Breshës, ku mbahej i izoluar prej momentit të ekstradimit.
“Ka mungesë provash reale të aftësisë së Alban Elezit në vendosjen e raporteve me ISIS për të garantuar një rekrutim të vërtetë të luftëtarëve të rinj të Shtetit Islamik drejt Sirisë”- thuhet në vendimin e Gjykatës italiane.
Një muaj më parë shqiptari 38-vjeçar nga Rashbulli i Kavajës u ekstradua nga Shqipëria drejt Italisë me vendim të Prokurorisë italiane e të prokurorit Leonardo Testi, nën akuzën e terrorrizmit në kuadër të operacionit “Ballkan Conection”.
Ky operacion i policisë italiane çoi në arrestimin e Alban Elezit në Shqipëri më 25 mars të 2015 e të nipit të tij në Elvis Elezi në Torino të Italisë.
Alban Elezi ashtu dhe nipi i tij Elvis Elezi janë tashmë në gjendje të lirë me vendim të marrë nga drejtësia italiane.
Itali, shpallet i pafajshëm shqiptari i akuzuar për xhihadizëm por riatdhesohet në Shqipëri
