Grupimi “Tifozët Kuq e ZI” ka protestuar sonte para kryeministrisë kundër ekstradimit në Serbi të Ismail Morinës, arrestuar kohë më parë në Kroaci për llogari të policisë serbe.
Në protestë, është i pranishëm edhe vëllai i Ismail Morinës, i cili u ka bërë apel autoritet shqiptare për të ndërhyrë, në mënyrë që të ndalohet ekstradimi i “Ballistit” në Serbi.
“Nëse jeni shtet ktheheni heroin në shtëpinë e vet”, ishte parulla që shpalosën tifozët kuqezi.
Në 11 gusht, një gjykatë e Apelit në Kroaci do të marrë në shqyrtim kërkesën e palës mbrojtëse që kundërshton vendimin e gjykatës së parë atje, për ekstradimin e Morinës në Serbi.
Morina u arrestua në Kroaci pasi ishte shpallur në kërkim nga autoritet serbe, si i dyshuari për ngritjen e dronit mbi stadiumin e Beogradit në tetor 2014 (gjatë ndeshjes Serbi – Shqipëri), me flamurin e “Shqipërisë së Madhe”.
Burime të pakonfirmuara thanë se të paktën një person është shoqëruar në polici nga protestuesit.
