Mirela Topulli, gruaja që shihet duke dhunuar fizikisht dhe duke kërcënuar gazetarin e emisioni investigativ Stop në Televizionin Klan, Genci Angjellari është shpallur në kërkim nga policia.
Administratorja e “Euroteam”, reagoi brutalisht, pasi gazetari zbuloi se kompania që ajo drejtonte në lumin Erzen derdhte mbetje të rrezikshme spitalore. Kur gazetari kërkoi shpjegime, Topulli nis menjëherë kërcënimet përpara kameras, siç duket edhe në këto pamje të transmetuara nga emisioni Stop.
Sulmi ndaj gazetarit ndodh ndërkohë që një person tjetër, që ishte në makinë me 42-vjeçaren Mirela Topulli, mban në dorë një levë.
Mbi administratoren e “Euroteam” rëndojnë akuzat e goditjes dhe fyerjes për shkak të detyrës, e shpërndarjes së mbetjeve kimike të rrezikshme dhe e ndotjes së ambientit.
Goditja për shkak të detyrës parashikon dënim nga gjobë deri në 3 vjet burg, ndërsa mbajtja dhe transportimi i substancave kimike dënohet nga 3 deri në 10 vjet burg.
“Euroteam” është licencuar në vitin 2013 për të trajtuar mbetjet e rrezikshme spitalore të Spitalit të Beratit dhe të disa spitaleve private në kryeqytet.
Investigimi i emisionit Stop zbuloi se në ambientet e kësaj kompanie nuk ekziston asnjë pajisje për të bërë dezinfektimin dhe asgjësimin e mbetjeve të rrezikshme spitalore.
