Partia Demokratike dhe Partia Republikane, kanë arritur në një marrëveshje për zgjedhjet vendore të 21 qershorit 2015. Sipas kësaj marrëveshje, dy partitë, bien dakord që në këto zgjedhje, në të 61 bashkitë, të përfaqësohen me kandidatë të përbashkët.
Duket se kreu i PR-së është tërhequr nga kandidatura e Agron Dukës për bashkinë e Durrësit. Ndërkohë që pritet të zyrtarizohet kandidatura e Grida Dumës për bashkinë e Durrësit, Fatmir Mediu shprehu mbështetjen e tij për këtë kandidaturë, duke hequr dorë nga kërkesa për kandidimin e Agron Dukës. Ai konfirmoi se në të 61 bashkitë PR dhe PD do të garojë me kandidatë të përbashkët.
“Ne kemi diskutime të përbashkëta me Dukën dhe Bashën për të analizuar mundësinë e fitorës nga e djathta të bashkisë Durrës. Në gjykimin tim Duka ishte fitues, por do të konsideronim cdo kandidaturë që mund të fitohet. Duma është një figurë publike politike, një zë i opozitës shqiptare dhe ne do të bëjmë atë që është me mira për të fituar bashkinë e Durrësit. Ka një marrëveshja në parim, ashtu siç janë konsideruar edhe figura të PR në bashki të rëndësishme të propozuara edhe nga PD , por të 61 kandidatët në rast të konkludimit të marrëveshjes, kandidatet janë si të PR ashtu edhe të PD. Kemi ecur me idenë që janë 61 kandidatë të opozitës. Sot besoj që jemi në një realitet më afër marrëveshjes, por ditën e hënë kur të mblidhet asambleja do të japim edhe vendimin përfundimtar për angazhimin në fushatën elektorale”, u shpreh Fatmir Mediu.
Zgjedhjet lokale, arrihet marrëveshja PD – PR, Fatmir Mediu mbështet kandidaturën e Grida Dumës në Durrës
