Flet gruaja e plagosur në Kashar: Altini na qëlloi në befasi, unë tentova të mbroj burrin

Naime Xhaferri, gruaja e viktimës, e cila mbeti e plagosur nga breshëria e plumbave në Kashar, pas mjekimit ka dalë nga spitali dhe është rikthyer në shtëpi.
Mjekët thanë se ajo ka pasur vetëm një plagë në njërën dorë.
Burime nga Policia thanë se ajo është qëlluar me një plumb në dorë, kur ka zgjatur krahun për të mbrojtur bashkëshortin, në momentin që ka parë autorin me armën e drejtuar nga ai. Plumbi i parë e ka qëlluar atë në dorë, ndërsa më pas ai ka qëlluar me breshëri ish­vjehrrin e tij, duke e lënë të vdekur në vend.
Në dëshminë e saj të parë për oficerët e grupit hetimor, 55­vjeçarja, Naime Xhaferri, ka treguar se janë gjendur në befasi përballë armës së autorit dhe se ai nuk u ka thënë asnjë fjalë, por i ka qëlluar menjëherë.
“Ne kishim dalë të dy bashkë me burrin dhe ishim në rrugë. Kishim disa shishe me qumësht që i shesim çdo ditë dhe po prisnim të vinte personi që ia dorëzonim. Sapo kemi lënë shishet në tokë kemi parë përballë Altin Alukun që na kishte drejtuar automatikun. E kam kuptuar se ai do të qëllonte dhe i zgjata dorën burrit që ta shtyja, në mënyrë që ta mbroja. Por ndjeva se u godita dhe burri u rrëzua në tokë. E pashë të gjakosur dhe nisa të kërkoj ndihmë, ndërsa ndoqa me sy autorin që iku me vrap drejt kodrave me armën që e mbante në dorë. Më kanë ndihmuar fqinjët, por nuk mbaj mend se çfarë ndodhi më pas. Me burrin nuk fola dot më, ai kishte vdekur”, ka deklaruar e plagosura në dëshminë e saj të shkurtër për oficerët e Policisë.
Burimet thanë se dëshmia e saj është lënë që të merret në një moment tjetër, për arsye të tronditjes që ka pësuar, por edhe për shkak të varrimit të bashkëshortit.
Megjithatë nga deklarimi paraprak i saj, fakti që autori nuk u ka thënë asnjë fjalë çiftit Xhaferri, nuk tregon shumë rreth motivit të saktë të ngjarjes.

/DRONI.al/