Rregullorja e re, si merret një leje ndërtimi dhe si mund të kryhen punime pa leje në shtëpi

Këshilli i Ministrave ka miratuar rregulloren e re të zhvillimit të territorit, ku përcakton qartësisht procedurat e aplikimit për leje ndërtimi, si dhe mënyrën si do merren në shqyrtim e do miratohen nga autoritetet vendore.
Sipas kësaj rregullore, asnjë punim ndërtimi nuk do të mund të kryhet në territorin shqiptar pa lejen e autoriteteve përkatëse, me përjashtim të ndërhyrjeve të vogla për mirëmbajtje të zakonshme: rifreskimi i lyerjes, suvasë, dyerve, zëvendësimi i hidro-sanitareve apo vendosja e tendave.
“Njësitë bazë të qeverisjes vendore, në ushtrimin e autonomisë së tyre, mund të miratojnë rregullore vendore të kontrollit të zhvillimit për të disiplinuar veprimtarinë ndërtimore në territorin e tyre administrativ. Këto rregullore përmbajnë rregullat, kushtet dhe mënyrën e ndërtimit, në mënyrë të veçantë, respektimin e dispozitave tekniko-estetike, higjieno-sanitare dhe të sigurisë së objekteve, në çdo rast në përputhje me dispozitat e kësaj rregulloreje”, thekson rregullorja e re.
Këshilli i Ministrave ka përcaktuar edhe procedurat e aplikimit për leje ndërtimi si dhe formularin përkatës që duhet të paraqitet te njësitë vendore për miratimin e saj. Kërkesa për leje ndërtimi paraqitet për shqyrtim përmes ngarkimit on-line të saj dhe dokumentacionit shoqërues në portalin përkatës, sipas procedurës së përcaktuar në të, ose përmes depozitimit të saj dhe të dokumentacionit shoqërues pranë sportelit të shërbimit.
“Autoriteti përgjegjës për shqyrtimin e kërkesës verifikon nëse dokumentacioni është i plotë brenda 5 ditëve nga paraqitja e tyre. Brenda këtij afati shqyrton identitetin e nënshkruesit dhe faktin nëse është personi i legjitimuar për të paraqitur kërkesën; plotësimin e plotë dhe të saktë të të gjitha të dhënave të detyrueshme të kërkuara në formular; paraqitjen e të gjitha dokumenteve shoqëruese të detyrueshme; pagesën e tarifës së shërbimit/aplikimit”, përcakton rregullorja.

/DRONI.al/