Prokuroria e Shkodrës kërkon dënimin me 35 vjet burgim për shtetasin Shpëtim Sadiku, i akuzuar për “vrasje me paramendim për hakmarrje”, në dëm të shtetasit Palok Lazri, ngjarje e ndodhur në 20 nëntor 2013, te zona e quajtur Ura Dervishbeg, në qytetin e Shkodrës, si edhe për armëmbajtje pa leje.
Sipas hetimit të Prokurorisë së Shkodrës, rezulton se viktima ka pasur një konflikt me vëllanë e autorit, për shkak të një borxhi që nuk ia kishte kthyer. Viktima ishte ndërtues dhe vëllai i autorit, shtetasi Ardit Sadiku punonte te kompania e Lazrit si roje dhe shofer.
Shtetasi Ardit Sadiku kishte pretendimin se shtetasi Palok Lazri i kishte detyrim rreth 100 mijë lekë të reja, për punën e kryer dhe të papaguar. Raportet mes Lazrit (viktimës) dhe vëllait të autorit kishin qenë konfliktuale prej disa kohësh para ngjarjes, madje në një rast, vëllai i autorit e ka qëlluar me thikë të vogël shtetasin Lazri në vitin 2012 dhe për këtë është dënuar me 8 muaj burgim.
Pavarësisht dënimit, raportet ndërmjet Lazrit dhe vëllait të autorit, shtetasit Ardit Sadiku, kanë vijuar të jenë konfliktuale, pasi pagesa që pretendohej ende nuk ishte paguar.
Pikërisht, ky konflikt i zgjatur në kohë, konsiderohet nga Prokuroria e Shkodrës si arsyeja kryesore që shtetasi Shpëtim Sadiku, në datën 20 nëntor 2013 ka ndjekur lëvizjet e shtetasit Palok Lazri dhe e ka qëlluar tre herë me pistoletë, duke i shkaktuar vdekjen e menjëhershme.
Hetimi ndaj autorit të dyshuar është zhvilluar me masën e sigurimit “arrest në burg”.
FOTO/ Shkodër, vrau për 1 milion lekë në vitin 2013, prokuroria kërkon 35 vite burg
