Ibrahim Basha, efektivi i RENEA-s i vrare dje në Lazarat u përcoll sot me nderimet më të larta shtetërore. Ceremonia në nder të tij nisi me nderimet fetare në xhaminë e Et’hem Beut, pasi 31-vjeçari ka qenë një besimtar i devotshëm i besimit mysliman. Pjesë e kësaj ceremonie ishin familjarë, të afërm, miq, kolegë, por dhe dhjetra besimtarë myslimanë.
“Ne sot nuk jemi për të nderuar vetëm një besimtar por jemi të gjithë së bashku për të nderuar një qytetar që i ka shërbyer shqiptarëve dhe Shqipërisë. Ai dha atë që është më e çmuar, gjakun etij, rininë e tij në shërbimin ndaj popullit dhe atdheut, që njëherazi është përkushtim ndaj Zotit dhe fesë islame”, tha ndër të tjera, myftiu i Tiranës, Ylli Gurra.
Të parët që janë përulur para trupit të të ndjerit kanë qenë kolegë të tij të RENEA-s, efektivë të Policisë së Shtetit, por edhe ish-kolegë të tij ushtarakë.
Në homazhet për nder të efektivit të vrarë një ditë më parë në Lazarat ishte edhe Presidenti Bujar Nishani, Kryeministri Edi Rama, Kryetari i Kuvendit Ilir Meta, ministra të kabinetit qeveritar si dhe diplomatë të akredituar në vendin tonë.
Kryeministri Edi Rama u shpreh se Ibrahim Basha ra si dëshmorë në kohë paqeje, duke u kthyer në një hero, i cili tregoi se paqja nuk është një luks, por një e mirë që duhet ruajtur. “Heroditi 2 000 vjet më parë tha se në kohë lufte baballarët varrosin djemtë, ndërsa në kohë paqe djemtë varrosen nga baballarët. Një e vërtet e dhimbshme, por që qendron në çdo kohë. Ibrahim Basha ra dëshmorë në paqe, ç’ka dëshmon se paqja nuk është një luks, por një e mirë e përbashkët për të cilën të gjithë duhet të sakrifikojmë dhe Basha bëri sakrificën më të madhe”, tha Rama.
“Nuk e dinim se ku jetonte. Nuk e njohim rrugën ku është rritur, nuk njohim lagjen ku ka luajtur për herë të parë me top. Nuk dimë se si është rritur dhe cfarë pëlqente. Nuk dimë cilës vajzë i ka hedhur për herë të parë shikimin dhe nuk denim se cila ishte skuadra e tij e zemrës, por Ibrahim Basha hyri në zemrat dhe mendjet tona me prepotencë dhe gjaku i tij u bë pjesë e trupit tonë, si një nevojë për të vijuar veprën e tij heroike për të garantuar paqen, rendin e sigurinë në vend”, tha Kryeministri.
Ministri i Brendshëm Saimir Tahiri, në homazhet e zhvilluara për efektivin e RENEA-s, Ibrahim Basha premtoi që ligji do të veprojë për këdo që ka guxuar apo guxoi të vërë dorë mbi shtetin dhe Policinë e Shtetit . Tahiri u shpreh se “thonë se heronjtë njihen kur flejnë nën dhe, po ti ishe hero dhe për së gjalli me shokët e tu, të vendit tënd dhe të huaj”.
Ambasadori i SHBA-së në Tiranë, Donald Lu, vuri në dukje se efektivi i forcave speciale RENEA, lbrahim Basha ka marrë pjesë përkrah forcave të NATO-s në misionet paqeruajtëse në Afganistan dhe Irak. “Ne nderojmë trimërinë dhe sakrificën e tij në luftën kundër krimit të organizuar dhe luftës ndaj narkotikëve. Unë i kam ndjekur së fundi forcat speciale. Aftësitë dhe profesionalizimi i tyre më kanë mahnitur. Këta persona të përkushtuar janë oficerët e policisë dhe ushtrisë më të mirë në Shqipëri. I gjithë kombi juaj duhet të jetë krenar për ta. Ne jemi krenar që shërbejmë përkrah tyre. Në emër të NATO-s dhe SHBA-së i shpeh ngushëllimet e mia familjes së tij dhe të gjithë shqiptarëve”, përfundoi Ambasadori amerikan në Tiranë.
Më pas rreth orës 16:40 u zhvillua edhe ceremonia e lamtumirës dhe Ibrahim Basha u vendos në varrezat e dëshmorëve. atsh
