LAZARAT/ Të arrestuarit në vendin e krimit për rindërtimin e vrasjes së oficerit të RENEA-s

Kur kanë kaluar më shumë se dy javë nga sulmi ndaj RENEA-s në Lazarat, ku u vra Oficeri Ibrahim Basha, Prokuroria për Krimet e Rënda vazhdon veprimet për rindërtimin e të gjithë dinamikës së ngjarjes. Hetuesit pritet të kryejnë një eksperiment në vendin ku u qëllua mbi policinë.
Burime nga Prokuroria për Krimet e Rënda konfirmojnë se në ditët në vijim pritet që disa nga të arrestuarit do të dërgohen në Lazarat, pikërisht në vendin ku RENEA-a u gjet nën breshërinë e armëve.
Sipas grupit hetimor, ata do të shpjegojnë mënyrën se si kanë qenë të organizuar, pozicionet e gjithsecilit dhe detyrat që u ishin caktuar. Të njëjtat burime saktësuan se fillimisht do të dërgohen në vendin ku ndodhi krimi, Xhulio Malo dhe Klodian Selimi.
Këta janë dy të akuzuarit që kanë pranuar të flasin deri tani dhe të jenë bashkëpunues me autoritet. Sipas grupit hetimor, dy të rinjtë do të shpjegojnë se, ku kanë qenë vendosur të gjithë anëtarët e grupi të zjarrit.
Nëse prokurorët do të shohin të arsyeshme do të dërgojnë në Lazarat dhe personat  e tjerë të arrestuar deri tani.
Nga dëshmitë e marra nga 17-vjeçari Malo është mundur të mësohet se kanë qenë 11 persona në grupin e zjarrit. 5 nga ata kanë pasur detyrë të qëllojë drejtpërdrejt mbi policinë. Pjesa tjetër do të qëllonte në ajër nga pozicione të ndryshme për të çorientuar policinë.
Nga ky veprim hetuesit do të kenë një ide më të saktë se kush ka qëlluar ndaj furgonit ku u vra një efektiv dhe u plagosën dy të tjerë. Një veprim tjetër që do të ndërmerret këto ditë është dhe krehja e zonës së krimit për të gjetur predhën më të cilën është qëlluar Ibrahim Basha.
Në këtë mënyrë do të përcaktohet edhe arma e saktë nga e cila ka dalë plumbi. Nga dyshime paraprake sipas prokurorëve është një armë e kalibrit të rëndë, duke rrëzuar teorinë se ai është qëlluar nga një snajper.
Të gjitha armët e gjetura në Lazarat janë në Policinë Shkencore, për ekzaminim balistik. Ajo çfarë është më e rëndësishme, për grupin hetimor aktualisht, është gjetja e armës që ka qëlluar mbi policin në 24 qershor.

/DRONI.al/