Ministria e Financave nuk po ia del dot të bindë shqiptarët se nuk ekziston një projektligj i mundshëm i propozuar për rritjen e tatimit mbi të ardhurat nga pagat. Përballë shifrave konkrete, karahasuese të ndryshimit, rritjes më saktë, të tatimit mbi pagat, ministria e Financave zgjedh të mohojë ekzistencën e projektligjit.
Ka qenë sot zëvendësministri i Financave Erjon Luçi, i cili në një konferencë për shtyp ka deklaruar se, “nuk ka ndryshim në skemën e tatimit e të ardhurave personale dhe nuk ka asnjë plan për ndonjë ndryshim të mundshëm në këtë drejtim”.
Ndërkohë, një e-mail i dërguar nga drejtoresha e Politikave dhe Marrëdhënieve Fiskale në Ministrinë e Financave, Arjana Dyrmishi për “grupet e interesit”, tashmë i bërë publik, pavarësisht përpjekjeve të mëvonshme nga Ministria e Finanavave për të mohuar ekzistencën e një projektligji të tillë, hedh edhe më shumë hije dyshimi për arsyet e vërteta të mohimit të ekzistencës së këtij projektligji.
“Ministria e Financave në bashkëpunim me misionin e FMN kanë hartuar draft ligjin e ri për tatimin mbi të ardhurat. Ju lutem gjeni bashkëlidhur kopje të draft ligjit për mendim dhe komente, me trach change… Për arsye se draft ligji është punuar me FMN dhe peër të pasur më shume kohë, po jua përcjellim në gjuhën angleze. Javës tjetër drafti do tju përcillet edhe në gjuhën shqipe. Do të vlerësonim dërgimin e komenteve tuaja brenda datës 30 gusht 2015”, shkruhet në këtë e-mail, duke mos lënë dyshime për ekzistencën e këtij projektligji, ndërsa shtojnë dyshimet për përpjekjet e mohimit të projekligjit.
Qeveria mohon apo tërhiqet nga projektligji për tatimin e pagave… ?!
