Partia Demokratike ka akuzuar OSHEE-në se po bën tendera korruptivë për trajnimin e punonjësve të saj. Përmes një deklarate për mediat, zëdhënësja e PD, Oriela Nebiaj, thotë se OSHEE ka mbledhur 720 mln lekë për t’ia dhënë “një miku të qeverisë”, duke vendosur kritere të tilla për tenderin, të cilat paracaktojnë fituesin. Në deklaratën e saj, PD thekson se OSHEE vazhdimisht është denoncuar për afera korruptive dhe tipar i saj kryesor është abuzimi.
“Siç e ka bërë traditë Edi Rama me agjencitë e tij, OSHE ka vendosur të mbledhë një shumë të madhe parash, 720 milionë lekë, për t’ia dhënë një miku të qeverisë. Ndiqet praktika e vendosur tashmë nga Edi Rama, me koncesionet dhe tenderat e tij, ku kriteret qepen në mënyrë të atillë, që t’i shkojnë për shtat fituesit të paracaktuar. Është hera e parë që OSHE vendos të shpenzojë kaq shumë para për trajnime. Sipas ekspertëve, organizata e shpërndarjes së energjisë, ka mbledhur të gjithë trajnimet bashkë, për t’ia dhënë me një dorë klientit të Edi Ramës. Këto 720 milionë lekë që dorovit OSHE sipas qejfit e interesave, janë sa vlera e 8 mijë e 728 pensioneve në fshat, sa 4 mijë e 799 pensione në qytet, 10 mijë e 511 pagesa papunësie, dhe 19 mijë e 846 ndihma ekonomike. OSHE ka aplikuar që në fillim dy standarde, duke dërguar në burg e duke i nxitur drejt vetëvrasjes familjarë të pamundur për debi deri në 30 mijë lekë të vjetra, ndërkohë që ka favorizuar klanet afër qeverisë e deputetë me detyrime qindra milionë lekë energji. OSHE është e specializuar në abuzime, pasi vetë drejtuesi i saj, i përzgjedhuri i Edi Ramës në krye të organizatës, është hetuar për abuzime në dhjetëra tendera në Bashkinë e Durrësit. Tenderi i fundit, ose më saktë, porosia e fundit për ti dhënë njeriut të Edi Ramës 720 milionë lekë, është në vazhdën e skandaleve qeveritare me fondet publike, me taksat e qytetarëve”, tha Nebiaj.
Partia Demokratike i bëri thirrje prokurorisë të hetojë këtë rast skandaloz të abuzimit financiar.
“Partia Demokratike do të vërë para ligjit e para përgjegjësisë abuzuesit me fondet publike, sapo shqiptarët t’i besojnë drejtimin e vendit”, përfundoi zëdhënësja e PD-së.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
