Kryetari i bashkisë nuk mund të rikandidojë më shumë se një herë. Qeveria ka vendosur të kufizojë punën e kryebashkiakëve vetëm në dy mandate të njëpasnjëshme sipas projektligjit të ri të hartuar nga ekzekutivi për Organizimin dhe Funksionimin e Qeverisjes Vendore.
Kufizimi i mandatit sanksionohet në nenin 59 të draftit të hartuar nga Qeveria Rama, ku në pikën 2 shkruhet shprehimisht se “Kryetari i Bashkisë mund të rizgjidhet dhe të ushtrojë vetëm 2 mandate të njëpasnjëshme në krye të Bashkisë, me të drejtë rizgjedhje”. Ky formulim do të thotë se një kryebashkiak që dëshiron një mandat të tretë, pas dy mandateve të para duhet të largohet nga drejtimi i punëve në qytetin e tij dhe të rikthehet në garë pas 4 vitesh pushimi.
Ky draft i hartuar nga ekzekutivi, aktualisht i është dërguar grupeve të interesit dhe ekspertëve për marrje mendimi, sipas abcneës. Më pas ai pritet t’i kalojë Kuvendit, ku do të ndjekë të gjithë procedurat parlamentare dhe është programuar që të miratohet brenda vitit, për të hyrë në fuqi më 1 janar të vitit të ardhshëm.
Drafti vjen pas reformës së re administrative-territoriale. Mes ndryshime të tjera që ai sjell, disa kanë të bëjnë edhe me këshilltarët bashkiakë. Këta të fundit, me projektligjin e ri, do të humbin të drejtën e pagës, së bashku me honoraret që përfitojnë për mbledhjet e Këshillit Bashkiak në të cilat marrin pjesë.
