Basha “tërheq zvarrë” Ramën, kreu i PD premton ulje taksash, kryeministri premton heqje taksash

Kryeministri Edi Rama vazhdon të jetë një hap mbrapa kreut të opozitës Lulzim Basha. Ndërkohë, që kreu i PD-së, prek kohësh ka kërkuar rishikimin e taksave, por ka ndeshur në heshtjen e qeverisë dhe veçanërisht, kryeministrit Rama, kur kreu i PD-së në takimet me bizneset, me shifra konkrete ka premtuar ulje taksash, këtë ka nxituar, më në fund të lajmërojë edhe Rama. Duke konkurruar me bashin, Rama në takimin me temë “Beteja kundër informalitetit”, lajmëroi sot nismën e re, sipas së cilës, bizneset e vogla që qarkullojnë deri në 20 milionë lekë (të vjetra) në vit nuk do të paguajnë më asnjë taksë të vetme.
Edi Rama ka theksuar se këto biznese, ku pronarët janë të vetëpunësuar, dhe me atë punë mbajnë familjen e tyre, do të mjaftohen vetëm me regjistrimin. Sipas kryeministrit, deri më tani këto biznese kanë paguar 250 mijë lekë në vit, ndërsa me nismën e re të qeverisë taksa do të bëhet zero.
Rama tha se kjo kategori ka nevojë për mbështetjen e shtetit dhe qeveria është gatshme t’iu vijë në ndihmë. Gjithashtu, kryeministri premtoi lehtësira më të mëdha për shitësit ambulantë.
Ndërkohë disa ditë më parë, nga Fieri, Lulzim Basha, në një takim me biznesmenë të vegjël premtoi se bizneset  që “qarkullojnë deri në 2 milionë lekë (të reja), pra 20 milionë lekë (të vjetra)  biznesi i vogël do të paguajë vetëm 100 mijë lek (të vjetra) në vit”.
Premtimi i Bashës, i cili “tërhoqi zvarrë” Ramën, kishte të bënte edhe me rritjen e nivelit të biznesit të vogël deri në 120 milionë lekë (të vjetra). Ndërsa për fashën e epërme, për ata që kanë xhiro deri në 120 milionë lekë (të vjetra) taksa maksimale nuk do të kalojë  600 mijë lekë (të vjetra), premtoi më tej Basha.
Në takimin e sotëm me temë “Beteja kundër informalitetit”, sipërmarrësit shprehen rezerva për ndryshimet ligjore kundër evazionit dhe informalitetit. Sipërmarrësit kritikuan qeverinë për kalimin pa u këshilluar me ta të ndryshimeve ligjore që ashpërsojnë masat kundër informalitetit dhe evazionit në Kodin e Procedurës Penale dhe Kodin Penal.
Përkundër kësaj Rama paralajmëroi vazhdimin e represionit ndaj biznesit.

/DRONI.al/