Diskutimet për reformën në drejtësi kanë ngecur në çështjen e zgjedhjes së drejtuesve të lartë të sistemit të drejtësisë.
Nga studio e lajmeve në Ora News, eksperti i PD-së për reformën në drejtësi, Enkelejd Alibeaj, tha se emërimet me 84 vota lënë hapësirë për kapje të sistemit nga politika.
Sipas tij, mazhoranca nuk po tërhiqet nga ky qëndrim që kundërshtohet edhe nga Komisioni i Venecias.
“Një nga çështjet që duhej të diskutohej sot ishte fakti sesi do të bëheshin emërimet e krerëve më të lartë të sistemit gjyqësor. Një nga çështjet që opozita ka ngritur është depolitizimi i sistemit. Kjo do të thotë që emërimet e larta në sistemin gjyqësor, në gjykatën kushtetuese, në KLD apo gjyqësor siç quhet tani, në këshillin e lartë të prokurorisë, për prokurorin e përgjithshëm, apo edhe komisioni ad-hoc që do të ngrihet për të vlerësuar dhe rivlerësuar gjyqtarët aktualë do duhet të jenë apolitikë. Ajo çfarë u pretendua sot nga ana e ekspertëve ishte që shumica në Kuvend të zgjedhë të gjithë këta funksionarë të lartë të sistemit të drejtësisë të jetë prej 3/5, 84 vota. Pretendimi ynë ishte i thjeshtë, 84 vota sot kontrollohen nga mazhoranca aktuale, blloku PS-LSI. Çfarë garancish ka që kjo shumicë nuk do të zgjedhë militantë partiakë? Ishte një formulë që e kishim atakuar që përpara se drafti të shkonte në Komisionin e Venecias”, u shpreh eksperti i PD-së.
Sipas Alibeajt ka ardhur koha për të parë mundësinë e aplikimit të metodave të reja.
Edhe pse deri tani janë diskutuar rreth 18 dispozita, Alibeaj thotë se nuk mund të japë afate për përfundimin e draftit përfundimtar.
Ndërkohë nga java e fundit e janarit ekspertët e Komisionit të Venecias pritet të vijnë sërish në Tiranë, ku do të njihen me draftin e hartuar nga ekspertët.
REFORMA NË DREJTËSI/ Alibeaj: Ja ku kanë “ngecur” diskutimet me mazhorancën
