Kontrolli i Lartë i Shtetit padit në prokuroi për “shpërdorim detyre”, dy ish-drejtues të Zyrës Vendore të Regjistrimit të Pasurive të Paluajtshme Tiranë. Gjithashtu KLSH pas auditimit për periudhën Janar 2012 – Qershor 2015 ka dërguar në prokurori dhe 6 përgjegjës zone dhe specialistë.
“Bazuar në shkeljet e konstatuara dhe të evidentuara në mënyrë më të detajuar në Raportin e Auditimit, KLSH ka depozituar pranë Prokurorisë së Rrethit Tiranë kallëzimin penal (nr. 703/22, datë 20.01.2016) penal për 8 persona, ish-nëpunës të ZVRPP Tiranë (2 ish-Drejtues F. H. dhe E. B. dhe 6 ish-përgjegjës zone dhe ish-specialist E. D., B. H., H. Xh., F. B., N. Z,. dhe E. Q.) me akuzën e “Shpërdorimit të detyrës” parashikuar nga neni 248 i Kodit penal, si dhe indicie penale (nr. 703/23, datë 20. 01. 2016) për 11 persona (drejtuesin aktual të ZVRPP Tiranë, 3 ish-drejtues, 3 jurist dhe 4 përgjegjës zone) për mosndjekje dhe mosevidentim të pajustifikuar të proceseve gjyqësore dhe administrative lidhur me 37 vendimet marrë nga Gjykatat dhe KVVTP. Në total dëmi ekonomik i konstatuar nga auditimi i KLSH-së arrin në rreth 298.52 milion lekë.”
Nga ky auditim, mësohet se rezultoi një performancë e ulët e ZVRPP në administrimin e praktikave dhe kërkesave në proces, të cilat për një periudhë rreth 5 vjeçare arrijnë mbi 15533 praktika dhe për të cilat ndonëse ZVRPP ka përfituar nga qytetarët rreth 55,3 milion lekë ende nuk iu ka ofruar atyre shërbimin për të cilin ata kanë kryer pagesën.
Si pasojë e mosbashkëpunimit me KVVVTP pranë Prefektit Tiranë, nga 2209 kërkesa të paraqitura është kthyer përgjigje vetëm për 836 kërkesa ose 37%, me tejkalim afati deri në 5 vjet.
Gjithashtu nga auditimi u evidentuan një sërë rastesh të regjistrimit me mbivendosje nga vetë ZVRPP, të pasurive të llojit tokë, troje, objekte.
Referuar shkeljeve të pasqyruara në kallëzimin penal të përcjell organit të Prokurorisë, KLSH ka konstatuar:
Shmangie të detyrimeve të investitorëve të pallateve në lidhje me taksën e kalimit të pronësisë.
Heqje të kufizimeve pa asnjë shkak ligjor dhe pa plotësuar dokumentacionin ligjor të kërkuar.
Regjistrime në favor të subjekteve private të kontratave për dhënien me qira të tokës bujqësore “shtet”.
Regjistrimi i objektit të një qendre tregtare duke mos llogaritur e arkëtuar detyrimin prej 171 milion lekë.
Regjistrimi i pasurive “ndërtesë”, në mungesë dhe me parregullsi të dokumentacionit, madje duke regjistruar në disa raste edhe sipërfaqe shtesë.
Lejimi i tjetërsimit dhe shitjes së pronës së kthyer “shtet” nga Gjykata.
Regjistrimi i pasurisë duke pajisur poseduesin e saj me certifikatë pronësie në një kohë kur dokumentacioni mbi pronësinë ka lidhje me një tjetër pasuri e pronarë të tjerë.
Heqje e kufizimit për pasuri të kufizuara si të përfituara në kundërshtim me ligjin pasi nuk mund të cilësoheshin si “tokë pa fryt” pasuri të ndodhura mbi argjinaturën e lumit “Lanë”.
Dëmi 298.52 milion lekë, KLSH padit dy ish-drejtues të ZVRPP Tiranë
