Kryetari i bashkisë së Pustecit ka përfunduar pas hekurave në Maqedoni, pasi akuzohet për manipulim zgjedhjesh. Mësohet se Edmond Themelko u arrestuar në qytetin Resnjë të Maqedonisë dhe akuzohet për pjesëmarrje në manipulime zgjedhore në Maqedoni.
Sipas mediave maqedonase, prangosja e zyrtarit është bërë me urdhër të Prokurorisë Special, duke mos përmendur emra, por vetëm duke bë me dije se ka shtetësi të dyfishtë.
Lajmi për këtë doli pas publikimit të rezultateve të operacionit “Titanik”, ku zyrtarë të lartë, akuzohen për manipulime të procesit zgjedhor, ryshfet në këmbim të votës dhe shkelje të së drejtës për të votuar.
Rasti i parë për të cilin Prokuroria Speciale Publike (PSP) hapi hetimet është “Titanik”, që ka të bëjë me veprat lidhur me zgjedhjet, njoftoi sot prokuroja speciale Katica Janeva.
Prokuroja Fatime Fetai në konferencën për mediat theksoi se është hapur procedim penal për shkeljen e të drejtës zgjedhore, ryshfet gjatë zgjedhjeve, shkatërrimin e materialeve zgjedhore dhe keqpërdorimin e mjeteve për fushatën zgjedhore në vitin 2012.
Gjatë konferencës u tha se ministrat e Punëve të Brendshme, të Transportit dhe Lidhjeve, dhe sekretari i qeverisë së atëhershme, si dhe persona të tjerë, e kanë shfrytëzuar ndikimin në shkallë lokale dhe shtetërore dhe kanë krijuar grup për kryerjen e veprës penale, që të mundësojnë fitore të një partie të caktuar politike në zgjedhje.
“Prokuroria speciale sot parashtroi kërkesë për arrestimin e tetë personave, por nuk saktësohet se për cilët bëhet fjalë. Një person tashmë është arrestuar dhe është nxjerrë para gjykatës”, shkruan MIA.
Edmond Themelko, përfaqësues i Partia Maqedonase, në aleancë me PS-në, është kryetari i parë i një prej 61 bashkive të reja në vend, bashkisë së Pustecit e cila përfaqëson komunitetin Maqedonas.
Prokuroja Fatime Fetai
