Ne foto, pamje nga Tirana diten qe u vizitua nga Sekretarja e Shtetit, Hillary Clinton
Policia e shtetit ka publikuar planin e masave me rastin e vizitës historike të Sekretarit amerikan të Shtetit, John Kerry në Tiranë.
Nëndrejtori i policisë për Sigurinë, Altin Qato, bëri të ditur se do të ketë kontroll të plotë të territorit për parandalimin e veprimtarisë kriminale, me 1548 forca policore në terren dhe një helikopter ushtarak që do të monitorojë gjithë kohën nga ajri.
Në këtë kuadër do të ketë bllokim të qarkullimit të disa rrugë që lidhi kryeqytetin me Rinasin. Konkretisht: Bllokimi do të nisë nga aeroporti i Rinasit “Nënë Tereza”, mbikalimi i Kasharit, superstrada Vorë- Tiranë, nga mbikalimi i Kasharit- mbikalimi i Kamzës-Sheshi “Shqiponja”- rruga “Dritan Hoxha”- Rruga e Durrësit.
Të bllokuar do të jenë dhe aksi rrugor sheshi Skënderbej- Bulevardi “Dëshmorët e Kombit”- Sheshi “Nënë Tereza” dhe rrugët lidhëse me to. Gjithashtu dhe rruga “Teodor Keko”, e njohur si Unaza e Re- Fabrika e Miellit- Bulevardi “Bajram Curri”- nga ura Teknologjike – Ura e Kolaudimit – Ura e Drejtorisë Tiranë – Ura e Dajtit deri te ura e Rrugës së Elbasanit. Aks tjetër i bllokuar është ai i bulevardit “Zogu i Parë” nga ministria e Drejtësisë deri tek sheshi “Skënderbej”. Gjithashtu njoftohen të gjithë drejtuesit e mjeteve që do devijohet aksi rrugor i Kamzës deri tek shinat e Trenit.
Parkimet e mjeteve duke filluar nga Sheshi Shqiponja deri te rruga Elbasanit si dhe prapa Muzeut nuk do të lejohet. Ndërkohë edhe autobusët urbanë nuk do të përdorin linjën e tyre të rregullt, por rrugët e pjesës veriperëndimore të Tiranës. I gjithë qarkullimi në këto akse do të jetë i bllokuar nga ora 07.00 deri në 15.00.
