Zbardhet organizimi dhe kryerja e atentatit në Fier. Sipas grupit të hetimit, të dhënat e deritanishme për zbardhjen e vrasjes së Denis Kasës e plagosjes së dy miqve të tij, Kelmend Kastrati dhe Elton Margaritari, kanë bërë të mundur dokumentimin e autorësisë së Ilir Memushajt dhe të shpallurit në kërkim E. Binjaku si edhe bashkëpunimin e Ylli Nazërajt dhe oficerit të SHISH- it Florjan Bushi në këtë krim.
Sipas të dhënave nga grupi i hetimit, provat e siguruara kanë çuar në zbardhjen e gjithë mekanizimit të vrasjes dhe rolet e secilit prej bashkëpunëtorëve.
Edhe pse nuk jepen detaje për shkak të sekretit hetimor, dyshohet se shkak i atentatit ka qenë një vazhdimësi konfliktesh mes Binjakut dhe fisit Kastrati, konflikt ky i dyshuar se u shënua para rreth 1 viti.
Siç tregojnë burime të Panorames, E. Binjaku dyshohet të ketë qenë organizatori i kësaj vrasjeje. Ai dyshohet se ka shkuar së bashku me Ylli Nazërajn në Tiranë dhe me një person tjetër, të cilit i kanë kërkuar të marrë një makinë me qira, pasi nuk kishin me vete dokumentet.
Ndërsa paratë që duhej të paguante për qiranë e makinës dyshohet se ia ka dhënë E. Binjaku. Këtë autoveturë e ka përdorur për pak kohë Ylli Nazëraj, i cili më pas, me porosi të Binjakut, ia ka dhënë Ilir Memushajt.
Për rreth dy ditë ky i fundit e ka përdorur mjetin për të kryer vëzhgime të objektivit të atentatit. Pas kësaj, në lojë është futur oficeri i SHISH-it, Florjan Bushi, i cili, po me porosi të E. B., dyshohet se i ka dhënë Memushajt informacione rreth personave që do të qëlloheshin.
Nga hetimet e deritanishme është arritur të konkludohet se Memushaj dhe E. Binjaku, tashmë i shpallur në kërkim ndërkombëtar, kanë qëlluar ndaj viktimës dhe të plagosurve.
Por duke vënë para provave hipotetike ditën e djeshme Ylli Nazërajn, hetuesit kanë nisur të dyshojnë se edhe Ylli Nazëraj mund të ketë asistuar në vrasje, pavarësisht se deri tani është provuar vetëm dhënia e ndihmës në sigurimin e kushteve dhe mjeteve për kryerjen e atentatit.
Po nga burime të gazetës Panorama mësohet se ashtu si Ilir Memushaj, edhe Ylli Nazëraj nuk ka pranuar të flasë asnjë fjalë. Sot ai pritet të paraqitet në Gjykatën e Fierit ku do të caktohet edhe masa e sigurisë ndaj tij. Dyshimet flasin se të tre të arrestuarit e deritanishëm janë paguar prej E. B. për të bashkëpunuar me të.
