KASTRIOT DERVISHI/ 20 shkurti 1991 dita e rënies së shtatores së diktatorit edhe në Korçë

Foto e Kastriot Dervishit

Kastriot Dervishi

20 shkurti 1991 nuk është ditë vetëm e rrëzimit të shtatores të diktatorit vetëm në Tiranë. Të njëjtën ditë populli i Korçës ka rrëzuar “Enverin e ri” që ishte vendosur në këtë qytet qysh prej 3 tetorit 1988. Jo nderim i fortë duhet sot edhe për popullin e qytetit në fjalë.
Për shkak të përqendrimit të vëmendjes në ngjarjet e Tiranës, zhvillimi i ngjarjeve të Korçës, duket sikur është lënë jashtë kujtesës historike. Për fat të keq, nuk ka asnjë fotografi të çastit kur shtatorja rrëzohet dhe tërhiqet zvarrë nëpër qytet. Pas rrëzimit të shtatores së Korçës, enveristët kanë vendosur një bust të vogël nga ato të zyrave të komiteteve, ndërsa organet e punëve të brendshme kanë arrestuar disa pjesëmarrës. Gjykata e Rrethit Korçë, me disa gjykatës që janë edhe sot pjesë e sistemit të drejtësisë, ka shpallur fajtorë dhe ka dënuar disa prej pjesëmarrësve me një afat vuajtje dënimi deri në 2 vjet heqje të lirisë. Në njërin prej vendimeve, thuhet se është “poshtëruar” publikisht emri i E. H.

Ja një pjesë nga arsyetimi i përmendur i gjykatës
“Duke u provuar kjo ngjarje, gjykata konkludon se duke marrë pjesë të sipërmit në grumbullim manifestimin dhe thirrje të kundërligjshme, si dhe duke ju bërë kërkesë për shpërndarje dhe nuk u larguan deri këtu, kanë shkelur kërkesat e dekretit ‘Mbi ndalimin, grumbullimin dhe manifestimin e shtetasve në vendet publike, e konkretisht nenet 5 e 6 të saj, për rrjedhojë duhet të dënohen në bazë të dekretit nr. 7408, datë 31. 07. 1990. Po kështu më tej, këta të pandehur duke u bashkuar me thirrjen për heqjen e përmendores së udhëheqësit E. Hoxha, si dhe me fyerje që poshtëronin personalitetin e kësaj figure, udhëheqës i luftës nacionalçlirimtare dhe themelues i shtetit të ri shqiptar, si dhe duke e shoqëruar këtë me kate dhune ndaj personave, autoriteteve të rendit për mbrojtjen e ligjeve, me prekje rëndë të rendit publik dhe nga këta të pandehur që ju dhanë zemër elementit huligan, të veprojnë direkt me përmendoren për heqjen e saj, këta të pandehur që po gjykohen kanë shkelur pika 3 e 4 të dekretit ‘Për mbrojtjen e monumenteve’, nr. 7459, datë 22. 01. 1991”.

/DRONI.al/