Papunësia në vend ka shënuar sërish rritje. Sipas shifrave zyrtare të Institutit të Statistikave, në periudhën tetor-dhjetor të vitit të kaluar papunësia për moshën 15 – 64 vjeç ishte 17.7 % nga 17.5 %, që ishte në tremujorin paraardhës.
INSTAT ka publikuar anketën e forcave të punës, e cila i bën matjet direkt nga terreni, duke shmangur në këtë mënyrë efektin fiktiv që japin të dhënat administrative (ku raportohet numri i të siguruarve, që u rrit ndjeshëm në tremujorin e fundit, pas aksionit antiinformalitet).
Në rritjen prej 0.2 % të papunësisë krahasuar me tremujorin paraardhës, rritjen me të madhe të papunësisë e kanë pësuar femrat me 0.4 %, ndërsa papunësia për meshkuj u rrit me 0,1 %.
Gjatë tremujorit të katërt 2015 për të rinjtë e moshës 15-29 vjeç, shkalla e papunësisë u ul vetëm me 0.1 %.
Ajo që bie në sy sipas INSTAT është së shkalla e papunësisë për personat me arsim të mesëm të përgjithshëm është 22.5 % ose 4.8 pikë përqindje më e lartë se niveli mesatar kombëtar.
E lartë është edhe shkalla e papunësisë për personat me arsim të lartë, prej 20.8 %.
Ndërsa për personat me arsim të mesëm profesional dhe ato me arsim deri në 8/9 vjeçar, shkalla e papunësisë është 14.6 %.
Shkalla e papunësisë është rritur me 0.06 pikë përqindje për meshkujt dhe 0.35 pikë përqindje për femrat.
INSTAT zhvlerëson propagandën e qeverisë, papunësia rritet edhe me 0.2 për qind
