Në momentin që Shqipëria është përfshirë në krizë ekonomike dhe kur raportet financiare flasin për deflacion, guvernatori i Shqipërisë Genti Sejko ndërmerr nismën edukative për “Paranë”. Edukimi i fëmijëve, sipas projektit të deklaruar, do të jetë nëpërmjet përrallëzave.
“Për më të vegjlit, gjatë kësaj jave do të ofrojmë materiale të shkruara të tilla si përrallëza, fletë pune si dhe emisione televizive argëtuese e didaktike. Përmes tyre synojmë të ngulitim tek fëmijët ndjenjën e kujdesit për paranë, dëshirën për të bërë llogaritje të thjeshta dhe idenë e kursimit si mjet për të përmbushur detyrimet dhe dëshirat e përditshme apo afatgjata”, u shpreh Sejko në nisjen e javës së “Parasë”.
Madje ai thekson se edukimi për paranë duhet të nisë që në moshë të re. Deklarata vjen në kohën e rritjes së papunësisë dhe krizës së emigrimit masiv.
Java e “Parasë”, një nismë globale kjo, do të organizohet në Shqipëri në bashkëpunim me Ministrinë e Arsimit dhe Sportit, Ministrinë e Mirëqenies Sociale dhe Rinisë dhe Shoqatën Shqiptare të Bankave. Aktivitetet të cilat do të jenë me natyrë argëtuese dhe ndërvepruese dhe sipas Sejkos “synojnë të përçojnë njohuritë e domosdoshme mbi paranë dhe botën e ndërlikuar të financave”.
Sipas Guvernatorit, organizimi do të ndihmojë konsumatorët të kuptojnë më mirë rreziqet që lidhen me administrimin e financave dhe lehtëson marrjen e vendimeve të duhura financiare.
Gjatë kësaj jave një numër i konsiderueshëm nxënësish dhe mësuesish në qytetin e Tiranës dhe rrethe të ndryshme të vendit do të mund të vizitojnë një bankë tregtare për të kuptuar si funksionon, të dëgjojnë leksione nga ekspertë të bankës qendrore dhe të bankave tregtare, si dhe të konkurrojnë me dijet e tyre ekonomike dhe financiare. Po ashtu është deklaruar se do të hapet Muzeu i Bankës së Shqipërisë.
“Të gjithë vizitorët, dhe veçanërisht fëmijët dhe të rinjtë, përveç ekspozimeve të monedhave, do të gjejnë një qendër të interaktive informimi për çështje që lidhen me financat dhe botën e parasë”, tha Sejko.
FOTO/ Shqipëria në deflacion, Guvernatori Sejko u tregon fëmijëve përralla me lekë
