Një nga premtimet e kryebashkiakut Erion Veliaj ka qenë shndërrimi i kopshti zoologjik në një “botë përrallash”. Premtimi i harruar rikthehet në qendër të vëmendjes, pasi një vazjë dy vjeçe është sulmuar nga ujku në kopshtin zoologjik, pasi, sikurse mësohet, ujku ishte lënë pa ngrënë.
Vajza e vogël dy vjeçe ka përjetuar momente tmerri gjatë vizitës. Ndërsa ndodhej bashkë me babanë e saj për të parë nga afër ato pak kafshë që kanë mbetur, fëmija është sulmuar nga ujku.
Ngjarja ka ndodhur paraditen e sotëm, ku vajza ka marrë plagë në dorën e djathtë ndërsa po i zgjaste kafshës një biskotë.
Babai i vajzës tregon se, personeli i Kopshtit Zoologjik as ndihmë të shpejtë nuk ka ofruar në këtë rast. Pasi vajzën e ka dërguar në Urgjencë, babai thotë se i është dashur të blejë dhe vaksinën.
Për fat të mirë përveç tronditjes psikologjike, pas mjekimit vajza ndodhet në gjendje të mirë shëndetësore.
Ndërkohë kanë reaguar zyrtarët e Agjencisë së Parqeve, të cilët thonë se, ngjarja nuk ka qenë serioze por vetëm një shqetësim i nënës së vajzës.
Sa i takon mungesës së ndihmës së parë, pretendohet se nuk është kërkuar një gjë e tillë edhe pse kjo duhet ofruar pa u kërkuar.
Në fund sqarohet gjithashtu se, “ujku është i vaksinuar dhe nuk ka asnjë rrezik edhe nëse ndodh kafshimi” dhe shtohet se po kryhen verifikime për këtë ngjarje.
FOTO/ Erion Veliaj harron ta ushqejë, ujku sulmon vajzën 2-vjeçare
