Autoriteti i Mediave Audiovizive, AMA zgjodhi sot kryetarin e këshillit të Ankesave dhe një anëtar të këtij Këshilli.
Gazetarja dhe moderatorja e televizionit Top Channel Monika Stafa u zgjodh kryetare ndërkohë që për pozicionin e anëtarit u zgjodh kryeredaktori i gazetës Shqip Urim Bajrami.
Më herët AMA kishte votuar për z. Erald Kapri, si anëtar i këtij Këshilli.
Stafa ishte konkurente e vetme per detyren e Kryetarit te Keshillit. Ajo mban graden doktor dhe mori 5 vota nga gjashtë të mundshme ndërkohë Bajrami u zgjodh në raundin e dytë të votimeve me 6 vota. Erald Kapri i cili u zgjodh që në dhjetor të vitit të kaluar po ashtu me 6 vota.
Roli i kësaj strukture, tashmë të plotësuar, do të jetë mbikëqyrja e zbatimit të kodit dhe rregulloreve të miratuara nga AMA, që kanë të bëjnë sidomos me respektimin e dinjitetit dhe të drejtave të tjera themelore të njeriut, në mënyrë të veçantë mbrojtjen e të miturve, të drejtës për informacion dhe sensibilizimit të opinionit publik, lidhur me respektimin e normave morale dhe etike në programet e ofruesve të shërbimeve audiovizive, thuhet në një njoftim të AMA.
