Sirianët e kapur në Kapshticë refuzojnë azilin në Shqipëri: Jeni më keq se ne, na riktheni në Greqi!

Të 16 refugjatët sirianë të ndaluar një ditë më parë në Kapshticë, mësohet se kanë refuzuar azilin në Shqipëri.  Ata kanë kërkuar rikthimin në Greqi.
Pasi u morën në pyetje nga autoritetet shqiptare të policisë kufitare, refugjatët thanë se nuk kishin qëllim të qëndronin në Shqipëri, por vetëm për të kaluar tranzit, në mënyrë që më pas të shkonin në Gjermani. Duke kundërshtuar të qëndrojnë në një kamp të mundshëm në Shqipëri, ata kanë refuzuar kategorikisht, duke preferuar rikthimin në Greqi.
Përkohësisht ata janë sistemuar te qendra e mbyllur për shtetasit e huaj që hyjnë në mënyrë të parregullt në kufi, në Kareç të Vorës.
Lidhur me këtë refuzim, deputeti demokrat Gent Strazimiri e konsideroi lajm të ditës atë që sipas tij, një grup sirianësh, të cilët vinin nga kampi i refugjatëve në Idomeni, thanë se nuk donin të merrnin azil në Shqipëri.
“Lajmin e ditës e morra me 2 titra në mëngjes. Titra e parë ishte: Policia ndalon 16 refugjatë. Titra e dytë: Refugjatët qe vijnë nga lufta refuzojnë azilin në Shqipëri. Titra e tretë nuk doli. Refugjatët sirianë ikin nga një tragjedi, por zgjidhja nuk është të përfundojnë në dëshpërim. Sirianët po na e thonë: Jeni më keq se ne, këtu s’rrimë”, deklaroi Strazimiri.