Pse Edi Rama e mban ende ministër Saimir Tahirin?

Dy pyetje i ka adresuar sot PD, kryeministrit Edi Rama, lidhur me atë se e mban mister ende Saimir Tahirin, dhe çfarë di ky ministër për kryeministrin, për të cilat nuk mund ta shkarkojë.
“Pse Edi Rama vazhdon ta mbajë akoma Saimir Tahirin?
Çfarë di Saimir Tahiri për Edi Ramën që nuk e shkarkon dot edhe pse ai është i faktuar botërisht si garanti i bandave më te rrezikshme të trafikut të drogës dhe krimit jo vetëm në Shqipëri por në Ballkan e më gjerë?”, pyeti në emër të PD-së, kreu i Departamentit të Rendit dhe Sigurisë në këtë parti, Enkelejd Alibeaj
Sipas Alibeajt, “Vetëm një kryeministër i kapur do të sfidonte qytetarët e tij, partnerët europiane dhe amerikanë duke mbajtur në krye të rendit një njeri të implikuar e të inkriminuar deri në fyt si Saimir Tahiri”.
Më tej, kreu i Departamentit të Rendit dhe Sigurisë në PD, rendit një seri ngjarjesh, të cilat, sipas tij, lidhin Saimir Tahirin.
“Një seri ngjarjesh kanë dëshmuar se Shqipëria ka pasur në krye të rendit që prej shtatorit të vitit 2013 një ministër të inkriminuar, ndërlidhësin e trafiqeve të drogës e shumë krimeve të tjera. Banditët më në zë të vendit nuk kanë pasur thjesht një pikë kyçe në polici, një lidhje politike diku, por kanë pasur drejtpërdrejt në dispozicion ministrin e Brendshëm.
E nisi me një fushatë selektive e klienteliste për lojërat e fatit, ku lulëzuan miqtë e tij e u fundosën të tjerët, një krekosje korruptive e Tahirit që la pas dhe një viktimë, një mikun e tij të afërt për të cilin ai ka përgjegjësi siç ia kanë bërë të ditur dhe familjarët.
Projekti i madh i Tahirit ishte krijimi i një hambari të madh droge të pa hasur më parë në vend, dhe ai organizoi gjithë infrastrukturën për këtë. Nën drejtimin e tij mbarë territori u mboll me kanabis. Pas çdo kodre me drogë është një pakt 30 përqindësh i bandave me Tahirin. Tahiri ka një grusht njerëzish koordinatorë të mbjelljes, rritjes dhe shitjes së drogës, mes tyre spikasin Habilajt, banda e Shullazit, dhe siç u evidentua Balili i Sarandës.
Kur Partia Demokratike e denoncoi në vitin 2014 emërimin e trafikantit të njohur në krye të transporteve në rajonin e Sarandës, qeveria e mbrojti dhe Tahiri u kujdes ti jepte dhe më shumë pushtet e paprekshmëri.
Kur doli se makinën private të ministrit të Brendshëm e përdornin Habilajt dhe s’kish polic ti ndalonte, Tahiri u zgjeroi atyre territorin.
Sa më shumë denoncohej lidhja e tij me Shullazin, aq më shumë ky i fundit rendonte krimet, vrasjet, gjobëvëniet, aq më i paprekshëm bëhej.
Shullazi u kap me policin e Tahirit në shërbim të tij, u kap duke kaluar makinën e blinduar në doganë pa kontroll, u kap në përplasje me armë, dhe në të gjitha rastet doli i pastër. Praktikisht, kupola e ministrisë dhe e policisë ishte zhvendosur në rrugën e Kavajës, në rezidencën e Shullazit.
Dhe kur u ndalua pas kërcënimit që i bëri kandidatit për rektor, Tahiri foli vetë me Shullazin përmes nëndrejtorit të policisë së Tiranës dhe e garantoi se do jetë thjesht një shëtitje, pa e ditur se prokuroria kishte punuar prej muajsh për gjetjen e provave për dhjetëra krime.
Tahiri është shërbëtor i zellshëm dhe i qëndron paktit me krimin. Kur goditen linja të trafikut nga shërbimet partnere ai shfajësohet se nuk ka dijeni, nuk e kanë prej tij. Ai i vuri shkrepësen provave të drogës në laborator për të fshirë gjurmët e bashkëpunëtorëve.
Me Tahirin në krye, u ngrit impianti më i madh i kokainës në Ballkan, në Xibrakë të Elbasanit, impiant që dhe sot do te ishte në punë nëse nuk do zbulohej nga policia gjermane.
Krerët e policisë me të cilët ai drejton, janë të gjithë një hartë interesash kriminale, të promovuar në postet kyçe nga Shullazi, prej besnikërisë që kanë treguar ndaj tij. Partia Demokratike i ka denoncuar me emra dhe me fakte dhe do të vazhdojë ta denoncojë në ditët në vijim kupolën e narkotrafikut në Policinë e Shtetit.
Janë këta më të besuarit e Tahirit, të cilët  prishin provat në vendngjarje, zhdukin armë e telefona që janë dëshmi e lidhjeve me krimin dhe dëshmi e krimeve të mëparshme.
Saimir Tahiri e pranoi vetë se kishte bërë biseda private në zyrë e në plazh me Bamin e akuzuar si vrasës me pagesë. Pra, ministri i Brendshëm ishte ulur me të si përfaqësues i njërës prej bandave. Janë disa vrasje pa autor sot, sepse autorët i njeh dhe i di Saimir Tahiri, kanë mbrojtjen e tij”, denoncoi Enkelejd Alibeaj.
Sipas PD, Saimir Tahiri duet larguar menjëherë, sepse  për sa kohë që ai është në krye të ministrisë së Brendshme,  jo vetëm bandat do të jenë në pushtet, por edhe ai është një turp për shqiptarët.
“Sa kohë të jetë Ministër i Brendshëm i vendit Saimir Tahiri, bandat janë në pushtet, droga lëviz ngado, krimet kanë licencë. Tahiri duhet të largohet menjëherë, ai është turpi i shqiptarëve, dhe shfytyrimi më kriminal i ndonjë  ministri të Brendshëm në 25 vite”, përfundon deklaratën e tij, Enkelejd Alibeaj.

/DRONI.al/