Policia e Tiranës ka arrestuar në flagrancë shtetasin S. K., 44 vjeç, banues në Vorë, i dyshuar për furnizim dhe shpërndarje të lëndës narkotike kokainë në zona të ndryshme të Tiranës.
Sipas policisë, bazuar në informacionet e siguruara nga inteligjenca policore, 44-vjeçari do të transportonte një sasi të konsiderueshme kokaine në zonën e Bulevardit të Ri dhe në segmentet rrugore që lidhin kryeqytetin me Urën e Paskuqanit.
Gjatë operacionit, shërbimet e Policisë e lokalizuan dhe e ndaluan në rrugën “Riglata”. Nga kontrolli fizik iu gjetën dhe sekuestruan dy paketime me lëndë të dyshuar narkotike kokainë, me peshë totale rreth 1 kilogram e 680 gramë.
Hetimet paraprake tregojnë se i arrestuari furnizonte persona të tjerë me kokainë për shitje në doza, ndërsa një pjesë të saj dyshohet se e shpërndante vetë.
Policia bëri të ditur se gjatë operacioneve të zhvilluara në muajt maj dhe qershor, në kuadër të aksionit “Zonat”, janë sekuestruar rreth 1.5 kilogramë kokainë dhe 1.1 kilogramë heroinë. Ndërkohë, në bashkëpunim me Prokurorinë, vijojnë hetimet për identifikimin e personave të tjerë të përfshirë në këtë veprimtari kriminale.
Materialet procedurale i janë referuar Prokurorisë së Tiranës për veprën penale “Prodhimi dhe shitja e narkotikëve”.a.b
