Adriatik Lapaj ka reaguar ndaj ligjit për “Investimet Strategjike” dhe “Paketës së Maleve”, duke i cilësuar si “dy mjetet juridike me të cilat po vidhet pasuria publike” në Shqipëri.
Në një postim publik, Lapaj shprehet se çdo ditë po shtohen debatet për pronat që po rrëmbehen përmes këtyre ligjeve, ndërsa komunitete të tëra po dhunohen dhe pasuri kombëtare po kalojnë padrejtësisht në duart e njerëzve pranë pushtetit.
Ai thekson se e vetmja mënyrë për të ndalur këtë padrejtësi është shfuqizimi i të dy ligjeve përmes referendumit kombëtar, duke iu referuar të drejtës kushtetuese të qytetarëve për të vendosur drejtpërdrejt.
Lapaj u ka bërë thirrje të gjithë qytetarëve që janë kundër këtyre ligjeve t’i bashkohen procesit të mbledhjes së firmave për dërgimin e çështjes në referendum.
“Më shkruani!”, përfundon thirrja e tij publike.
