Në foto Rama, Shehaj si drejtoreshë e Tatimeve dhe Spiropali si drejtoreshë e Doganave
Kryeministri Edi Rama ka fituar gjyqin për shpifje ndaj ish-drejtoreshës së Tatimeve, Brisida Shehaj, lidhur me deklaratat publike të kësaj të fundit për korrupsionin, taksën e naftës dhe funksionimin e Bordit të Transparencës.
Lajmi u bë publik nga mediat këtë të diel, ndërsa vetë Shehaj reagoi me një postim të gjatë në rrjetet sociale, ku sulmoi kryeministrin dhe paralajmëroi se do ta ankimojë vendimin në Apel.
Në reagimin e saj, Shehaj ironizoi mënyrën se si, sipas saj, mazhoranca po e paraqet vendimin si një “fitore politike”, ndërsa theksoi se nuk do të tërhiqet nga akuzat që ka ngritur ndër vite ndaj qeverisë.
“Qysh nga 2022 kur nisi kjo gjueti personale e Ramës në gjykatë ndaj meje, koha provoi se ajo që u quajt ‘shpifje’ është kusuri në shpinën e rraskapitur të shqiptarëve”, shkruan ajo.
Ish-drejtoresha e Tatimeve rendit në reagim disa prej çështjeve për të cilat thotë se ka folur publikisht, duke përmendur akcizën e naftës, koncesionet, kontrabandën dhe raportet e kontrollit financiar.
“Çështjen e kam çuar në apel dhe deri në verdiktin final do të pres drejtësinë. Edhe atë që e kontrollon vetë lideri suprem. E nëse sërish vendosin kundra meje jam e qetë, sepse mund ta fitojë këtë gjyq Edi Rama, por ka humbur epokën”, shprehet Shehaj.
Ajo shton më tej se do të vijojë përballjen politike dhe publike me kryeministrin dhe sistemin që, sipas saj, ai përfaqëson.
“Edhe pas kësaj, ti dhe sistemi yt do të më keni përballë. Asnjë milimetër anash. Pas kurrë!”, përfundon reagimi i saj.
