Policia e Sarandë ka zbardhur atentatin me eksploziv të ndodhur në muajin shkurt të këtij viti në Konispol, ku objektiv i sulmit ishte një 57-vjeçar, Mirash Gjikola.
Pas hetimeve intensive të kryera nga strukturat për Hetimin e Krimeve të Rënda në DVP Vlorë dhe Komisariati i Policisë Sarandë, nën drejtimin e Prokurorisë së Sarandës, janë identifikuar dhe shpallur në kërkim dy autorët e dyshuar të ngjarjes.
Sipas policisë, bëhet fjalë për shtetasit Griseld Taullaj, 39 vjeç dhe Xhafet Bajo, 39 vjeç, të dy banues në Sarandë.
Ngjarja ka ndodhur më 5 shkurt 2026, në vendin e njohur si “Kryqëzimi i Urës së Vrinës”, në Konispol, ku dyshohet se autorët kanë vendosur lëndë plasëse në automjetin që drejtohej nga shtetasi M. Gj., 57 vjeç, me qëllim eliminimin e tij.
Për dy të dyshuarit, Gjykata e Shkallës së Parë e Juridiksionit të Përgjithshëm Sarandë ka caktuar masën e sigurisë “Arrest në burg” për veprat penale “Vrasja me paramendim”, kryer në bashkëpunim, mbetur në tentativë”, si dhe “Mbajtja pa leje dhe prodhimi i armëve, armëve shpërthyese dhe municionit”. a.b
