U mbajtën prej orës 09:00 homazhet zyrtare në nder të profesor Servet Pëllumbi, të cilat po mbahen në ambientet e Teatri Kombëtar i Operas dhe Baletit. Në orën 13:00 kortezhi mortor u nis drejt varrezave të Sharrës, për në banesën e fundit.
Pëllumbi u nda nga jeta në moshën 89-vjeçare, duke lënë pas një kontribut të rëndësishëm në momentet kyçe të fillimit të demokracisë në Shqipëri. Vendimet dhe roli i tij në atë periudhë konsiderohen si referencë për zhvillimet politike dhe institucionale të vendit. Nga figura të shumta të jetës publike dhe politike kanë ardhur mesazhe ngushëllimi për ndarjen e tij nga jeta.
Ai vlerësohet si një ndër figurat kryesore të tranzicionit demokratik dhe një kontribues i spikatur i Partia Socialiste e Shqipërisë. I lindur më 14 dhjetor 1936 në Korçë, Pëllumbi u nda nga jeta pak përpara përvjetorit të 35-të të kësaj force politike, në themelimin dhe konsolidimin e së cilës ai pati rol të rëndësishëm.
Kryeministri Edi Rama e ka kujtuar me një foto simbolike të realizuar më 28 maj 1996, kohë kur Pëllumbi drejtonte partinë në opozitë si nënkryetar, ndërsa Fatos Nano ndodhej në burg. “Lamtumirë profesor i dashur!”, shkroi Rama në rrjetet sociale. Ndërkohë ai mabjti një fjalë përpara arkivolit të tij.
Gjatë karrierës së tij, Servet Pëllumbi u dallua si një ndër deputetët më jetëgjatë të Kuvendit të Shqipërisë, me angazhim aktiv në komisione të ndryshme parlamentare. Në vitin 2002 ai u zgjodh Kryetar i Kuvendit, detyrë që e mbajti deri në vitin 2005.
Edhe drejtues të tjerë të politikës kanë shprehur vlerësime për figurën e tij. Kryetari i Kuvendit, Niko Peleshi, e cilësoi si “politikan tolerant, mendimtar dhe vizionar”, ndërsa kreu i grupit parlamentar të socialistëve, Taulant Balla, e përshkroi si një profesor të madh që i dha shumë vlera partisë në kohë të vështira.
Në aspektin akademik, Pëllumbi u diplomua në Universitetin e Shën Petersburgut dhe mbajti titullin “Doktor i Shkencave”. Ai punoi si pedagog në Institutin Pedagogjik të Korçës dhe më pas në Universiteti i Tiranës, duke dhënë një kontribut të gjatë në arsimin e lartë. Gjithashtu, ai është autor i dhjetëra librave dhe studimeve në filozofi, politikë dhe demokraci.
Pas ndryshimeve demokratike të viteve ’90, Pëllumbi mbajti postin e nënkryetarit të Partisë Socialiste deri në vitin 1996, duke përfaqësuar një nga figurat kryesore në drejtimin dhe orientimin e saj gjatë asaj periudhe.a.b
