Zbardhen detaje të reja nga aksidenti i rëndë në Durrës, ku humbën jetën dy fëmijë të mitur dhe një tjetër mbeti i plagosur rëndë.
Burime bëjnë me dije se drejtuesi i automjetit, i identifikuar si Nikoll Radaci, rezultoi me nivel alkooli 0.7 në testin e kryer pas ngjarjes. Po ashtu, ai rezulton të jetë gjobitur rreth 10 herë më parë për shkelje të rregullave të qarkullimit rrugor, kryesisht për tejkalim shpejtësie.
Sipas të dhënave paraprake nga hetimet, në momentin e aksidentit automjeti dyshohet se po lëvizte me një shpejtësi mbi 90 km/h, çka mund të ketë ndikuar drejtpërdrejt në pasojat fatale.
Autoritetet vijojnë hetimet për të sqaruar plotësisht rrethanat e ngjarjes, ndërsa drejtuesi i mjetit pritet të përballet me akuzat përkatëse.
