Bashkia Gjirokastër ka reaguar ndaj përhapjes së disa informacioneve në rrjetet sociale për infektim me SIDA të drejtuesit dhe 18 punonjësve. Në një deklaratë të bashkisë shpërndarë edhe nga kryetari i bashkisë Flamur Golemi cilësohen si tërësisht të pavërteta dhe të fabrikuara, lajmin dhe sr ai u publikua me qëllim krijimin e panikut dhe pasigurisë te qytetarët.
Në një deklaratë zyrtare, institucioni hedh poshtë pretendimet sipas të cilave Kryetari i Bashkisë dhe 18 punonjës të administratës janë të infektuar me virusin HIV/AIDS, duke i konsideruar këto lajme si shpifje pa asnjë bazë faktike apo reale.
Sipas Bashkisë, përhapja e këtyre informacioneve nuk përbën thjesht dezinformim, por një veprim të rëndë dhe të rrezikshëm që synon të dëmtojë imazhin e institucionit, të cenojë dinjitetin e punonjësve dhe të krijojë panik të pajustifikuar në komunitet. Në reagim theksohet se përmbajtje të tilla nuk lidhen me të drejtën për informim, por përfaqësojnë përpjekje dashakeqe për të destabilizuar klimën publike.
Bashkia Gjirokastër rikujton se përhapja e informatave të rreme me qëllim shkaktimin e panikut përbën vepër penale, e parashikuar nga neni 267 i Kodit Penal të Republikës së Shqipërisë, i cili parashikon gjobë ose deri në pesë vite burgim.
Për këtë arsye, institucioni u ka bërë thirrje Policia e Shtetit dhe Prokuroria e Republikës së Shqipërisë që të nisin menjëherë hetimet për identifikimin e autorëve dhe shpërndarësve të këtyre lajmeve të rreme, si dhe t’i vënë ata përpara përgjegjësisë ligjore.
Në fund të reagimit, Bashkia garanton qytetarët se nuk ekziston asnjë situatë e tillë dhe se aktiviteti i institucionit vijon normalisht, në shërbim të komunitetit. Njëkohësisht, ajo paralajmëron se do të ndjekë të gjitha rrugët ligjore për mbrojtjen e reputacionit të saj dhe u bën thirrje qytetarëve dhe mediave që të verifikojnë informacionet dhe të shmangin përhapjen e lajmeve të pavërteta.a.b
