Shoqata e Siguruesve të Shqipërisë ka reaguar zyrtarisht pas zjarrit të ndodhur në zonën e “Farmacia 10” në Tiranë, duke e cilësuar ngjarjen si një alarm serioz për rreziqet që kërcënojnë jetën dhe pronën e qytetarëve.
Në deklaratën e saj, shoqata thekson se raste të tilla, fatkeqësisht, nuk janë të rralla dhe nënvizon rëndësinë e sigurimit të pronës si një nga instrumentet kryesore për mbrojtjen financiare të familjeve dhe bizneseve.
Reagimi vjen edhe në një moment kur, sipas shoqatës, në hapësirën publike po qarkullojnë interpretime të pasakta lidhur me funksionimin e sigurimeve, duke krijuar perceptimin se dëmshpërblimi nuk realizohet në raste zjarri. Shoqata i cilëson këto deklarata si të gabuara dhe dezinformuese për qytetarët.
Për të sqaruar opinionin publik, theksohet se në kushtet standarde të sigurimit nga zjarri, mbulimi lidhet me pasojën e ngjarjes dhe jo me shkakun teknik të saj. Kjo do të thotë se dëmet e shkaktuara nga zjarri, përfshirë rastet që vijnë nga defekte elektrike apo shkaqe aksidentale, dëmshpërblehen sipas kushteve të kontratës së sigurimit.
Shoqata garanton se çdo kërkesë për dëmshpërblim trajtohet mbi bazën e fakteve dhe të drejtave kontraktuale, duke siguruar një proces të drejtë dhe transparent.
Në deklaratë theksohet gjithashtu se sigurimi nuk zëvendëson respektimin e standardeve teknike dhe të sigurisë, por shërben si një shtresë shtesë mbrojtjeje financiare në rast se rreziqet materializohen.
Në përfundim, Shoqata e Siguruesve u bën thirrje qytetarëve të informohen nga burime të besueshme dhe të mos bien pre e keqinformimit, duke nënvizuar se sigurimi nuk e ndalon ngjarjen, por ndihmon në përballimin e pasojave të saj.a.b
