Një operacion i gjerë i zhvilluar nga SPAK ka çuar në goditjen e një grupi të strukturuar kriminal, i cili vepronte në disa qytete të vendit dhe merrej me trafik droge, armëmbajtje pa leje dhe pastrim parash.
Sipas burimeve zyrtare, janë lëshuar 11 masa sigurie, ndërsa deri më tani janë arrestuar 7 persona, ndërkohë që vijojnë kërkimet për personat e tjerë të përfshirë në këtë aktivitet kriminal. Ndër të arrestuarit edhe vëllai i Jetmir Pepës.
Hetimet janë drejtuar nga prokurori i SPAK, Alfred Shehu, i cili ka dokumentuar veprimtarinë e grupit dhe rolin e secilit anëtar në këtë rrjet.
Në kuadër të këtij operacioni është lëshuar urdhër arresti edhe për personin e konsideruar si drejtues i grupit, Jetmir Pepa, i njohur ndryshe si “Mir Pepa”, i cili dyshohet se drejtonte aktivitetin kriminal dhe menaxhonte fitimet e përfituara nga trafiku dhe pastrimi i parave.
Sipas hetimeve paraprake, grupi kishte ngritur një strukturë të mirëorganizuar, duke operuar në disa qytete dhe duke përdorur mënyra të ndryshme për të fshehur gjurmët e aktivitetit të paligjshëm, përfshirë investime në biznese për të legalizuar të ardhurat.
Operacioni vijon, ndërsa autoritetet pritet të japin detaje të tjera në vijim mbi këtë çështje.a.b
