Policia e Tiranës ka finalizuar operacionin e koduar “Hijet”, duke goditur një rast të rëndë të marrjes me forcë dhe dhunimit të një 32-vjeçari me qëllim përfitimi monetar.
Në pranga janë vënë Hysen Neza, 33 vjeç dhe Kevin Neza, 25 vjeç, ndërsa është shpallur në kërkim një bashkëpunëtor i tyre, 28-vjeçari J. N., banues në Xhafzotaj.
Sipas hetimeve, tre të dyshuarit kanë marrë me forcë në automjet një 32-vjeçar më 31 mars 2026 dhe e kanë mbajtur për disa orë në një ambient në Xhafzotaj, ku e kanë kanosur dhe ushtruar dhunë fizike ndaj tij për ta detyruar të jepte një shumë parash.
Operacioni u zhvillua nga Sektori për Hetimin e Krimeve të Rënda, në bashkëpunim me Forcën Operacionale dhe njësinë “Shqiponja”, pas kallëzimit të bërë nga viktima.
Gjatë ndërhyrjes, policia sekuestroi 5 automjete, 5 telefona celularë, një shumë parash dhe sende të tjera të kundërligjshme që dyshohet se janë përdorur në këtë aktivitet kriminal.
Autoritetet vijojnë punën për kapjen e personit të shpallur në kërkim dhe për zbardhjen e plotë të rrethanave të ngjarjes, ndërsa materialet procedurale i janë referuar Prokurorisë për veprime të mëtejshme.
