Autoriteti Kombëtar i Ushqimit (AKU) ka bllokuar afro 4 ton produkte në një subjekt në lagjen Shkozë, pas një denoncimi të bërë nga qytetarët.
Sipas njoftimit zyrtar, inspektorët e AKU kryen kontroll në subjektin “Merja”, ku gjatë verifikimit të magazinës konstatuan 3,984 kilogramë produkte të miksuara, të përbëra nga bimë të thata të ambalazhuara në thasë plastikë.
Gjatë inspektimit u evidentua se produktet ishin të paetiketuara dhe pa informacion të detyrueshëm, si afati i përdorimit, origjina apo përbërja e tyre.
Për shkak të këtyre shkeljeve, AKU vendosi bllokimin e menjëhershëm të gjithë sasisë së produkteve të gjetura në magazinë.
Ndaj subjektit u vendosën gjithashtu edhe masa administrative:
- 200 mijë lekë gjobë për mungesë të gjurmueshmërisë së produkteve;
- 100 mijë lekë gjobë për moszbatimin e sistemit të vetëkontrollit, përfshirë mungesën e skedave të monitorimit gjatë procesit të miksimit.
Autoriteti Kombëtar i Ushqimit thekson se do të vijojë kontrollet për të parandaluar çdo praktikë që cenon sigurinë ushqimore dhe u bën thirrje qytetarëve të denoncojnë çdo parregullsi përmes adresës elektronike info@aku.gov.al.
