Deputeti i Partia Demokratike e Shqipërisë, Besart Xhaferri mori pjesë sot në një takim që kreu i Delegacionit të Bashkimit Europian në Tiranë, Silvio Gonzato, zhvilloi me drejtues të nënkomisionit për Auditimin e Sektorit Publik.
Në takim mori pjesë edhe një anëtare e Nënkomisioni për Auditimin e Sektorit Publik, si dhe Kryetarja e Komisionit të Ekonomisë, Financës dhe Punësimit, Milva Ekonomi.
Xhaferri theksoi se nënkomisioni që drejtohet nga opozita ka një rol kyç në procesin e integrimit europian, pasi synon të parandalojë abuzimet me financat publike dhe atë që ai e cilësoi si “gjakderdhje financiare”, e cila sipas tij rrezikon ta lërë Shqipërinë të dobësuar në rrafshin ekonomik.
Sipas deputetit demokrat, gjatë takimit ambasadori Gonzato u ndal tek rëndësia e këtij nënkomisioni në forcimin e transparencës dhe kontrollit mbi sektorin publik.
Nga ana tjetër, Xhaferri ngriti shqetësimin se puna e opozitës në Kuvend po pengohet nga votimi mekanik i mazhorancës, duke theksuar se debatet dhe argumentet shpesh zëvendësohen nga “mekanizmi i kartonave”.
Ai deklaroi gjithashtu se projektligjet e propozuara nga opozita rrëzohen në Parlament dhe më pas, sipas tij, vonohen apo ripropozohen nga mazhoranca, duke shtyrë zbatimin e nismave që do të kishin ndikim për qytetarët.
Në takim u ngrit edhe çështja e kufizimit të fjalës së opozitës në seancat parlamentare dhe e pamundësisë për ngritjen e komisioneve hetimore, që sipas Xhaferrit do të shërbenin për të garantuar transparencë mbi çështjet dhe aferat publike.
Deputeti i PD-së i kërkoi ambasadorit Gonzato që këto shqetësime t’i përcjellë tek institucionet e Bashkimit Europian në Bruksel, duke theksuar se opozita nuk synon të pengojë integrimin e vendit.
“Për ne nuk ka plan B, ka vetëm plan A, që është integrimi i Shqipërisë në Bashkimin Europian”, u shpreh Xhaferri.a.b
