Gjykata e Posaçme e Shkallës së Parë për Korrupsionin dhe Krimin e Organizuar ka vendosur të heqë masat e sigurisë ndaj Ajola Xoxes, pas një kërkese të paraqitur nga vetë ajo në gjykatë.
Sipas njoftimit zyrtar, Xoxa paraqiti më 26 mars 2026 një kërkesë për revokimin ose zëvendësimin e masave të sigurisë personale të vendosura më herët nga gjykata, konkretisht “ndalimi i daljes jashtë shtetit” dhe “detyrimi për t’u paraqitur në policinë gjyqësore”.
Pas shqyrtimit të kërkesës, trupi gjykues i përbërë nga gjyqtaret Engjëllushe Tahiri, Rudina Palloj dhe Alma Kodraliu vendosi pranimin e saj.
Me vendimin nr. 248, datë 30 mars 2026, gjykata vendosi revokimin e dy masave të sigurisë që ishin caktuar më herët me vendimin nr. 14, datë 12 shkurt 2025 të Gjykatës së Posaçme.
Sipas burimeve nga procesi, një nga provat e paraqitura për ndryshimin e masës ishte gjendja shëndetësore e Ajola Xoxes dhe fakti që ajo është shtatzënë.
