Një konflikt i dhunshëm ka ndodhur paraditen e sotme në një servis makinash në qytetin e Korçës, ku si pasojë kanë mbetur të plagosur katër persona, mes tyre edhe pronari i servisit.
Sipas informacioneve paraprake, i plagosur ka mbetur pronari i servisit të tapicerisë, Renaldo Xhixho, si dhe tre persona të tjerë të identifikuar si Ergys Themelko, Erion Demolli dhe Lidi Meno.
Ngjarja ka ndodhur në lagjen nr. 10 të qytetit dhe ka shkaktuar panik në zonë, ndërsa policia ka nisur hetimet për të sqaruar plotësisht rrethanat e konfliktit.
Burime bëjnë me dije se tre personat kishin çuar një automjet në servis për t’i ndryshuar ngjyrën. Ditën e sotme ata janë kthyer në ambientet e servisit duke pretenduar se nuk ishin të kënaqur me rezultatin e punës.
Mësohet gjithashtu se pagesa për shërbimin nuk ishte kryer, çka ka përshkallëzuar debatin mes palëve dhe ka çuar në një konflikt fizik. Gjatë përplasjes është përdorur edhe një mjet i mprehtë, dyshohet gërshërë.
Të plagosurit janë transportuar në spital për ndihmë mjekësore. Sipas burimeve spitalore, njëri prej tyre ka marrë dëmtime në shpatull dhe krah, një tjetër në fytyrë, ndërsa dy të tjerët kanë pësuar lëndime më të lehta.
Policia po vijon hetimet për zbardhjen e plotë të ngjarjes.a.b
