Një 43-vjeçar i shpallur në kërkim ndërkombëtar nga autoritetet italiane është arrestuar në Tiranë në kuadër të operacionit policor të koduar “Vendimi”.
Operacioni u finalizua nga shërbimet e Seksionit të Kërkimit, në bashkëpunim me Seksionin për Hetimin e Krimeve të Rënda në Drejtorinë Vendore të Policisë Tiranë, pas informacioneve të siguruara në rrugë operative për vendndodhjen e të kërkuarit.
Si rezultat i ndërhyrjes policore, në rrugën “Don Bosko” u bë e mundur kapja dhe arrestimi i përkohshëm, me qëllim ekstradimi, i shtetasit Elton Miha, 43 vjeç, banues në Tiranë.
Sipas policisë, 43-vjeçari ishte shpallur në kërkim ndërkombëtar pasi Gjykata e Apelit e Firences në Itali e ka dënuar në vitin 2015 me 11 vite e 10 muaj burgim për veprat penale “vjedhje e rëndë”, “shfrytëzim prostitucioni” dhe “shkelje të ligjit për migracionin”, të parashikuara nga Kodi Penal italian.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për vijimin e procedurave me qëllim ekstradimin e tij drejt Italisë.
