Sipas një raportimi të Deutsche Welle (DW), Komisioni Evropian po shqyrton mundësinë që edhe udhëtarët nga Bashkimi Evropian të përfitojnë tarifa më të favorshme roaming-u në vendet e Ballkanit Perëndimor.
Për këtë qëllim, Komisioni ka propozuar hapjen e negociatave me gjashtë vendet e rajonit: Shqipëria, Bosnja dhe Hercegovina, Kosova, Mali i Zi, Maqedonia e Veriut dhe Serbia. Nisma është bërë publike nga autoriteti me seli në Bruksel dhe tashmë pritet miratimi i shteteve anëtare të BE-së.
DW thekson se aktualisht ekzistojnë marrëveshje vullnetare mes operatorëve celularë që ofrojnë tarifa pjesërisht të reduktuara në rajon. Megjithatë, nëse negociatat përfundojnë me një marrëveshje të plotë, qytetarët e BE-së do të mund të përdorin telefonat e tyre në Ballkanin Perëndimor njësoj si në vendin e origjinës, duke paguar të njëjtat tarifa si brenda vendit. Që prej mesit të vitit 2017, qytetarët e BE-së nuk paguajnë tarifa shtesë roaming kur udhëtojnë brenda vendeve të unionit.
Në raportim nënvizohet gjithashtu se Bashkimi Evropian mbetet i hapur për anëtarësimin e gjashtë vendeve të Ballkanit Perëndimor, por secili prej tyre duhet të dëshmojë përparim konkret në zbatimin e reformave. Sipas analizës më të fundit të Komisionit Evropian, Mali i Zi konsiderohet më i avancuari në procesin e integrimit, ndërsa negociatat me Podgoricën mund të përmbyllen deri në fund të vitit. a.b
